बुटवल । बुटवलमा जारी नवौ राष्ट्रिय खेलकुद २०७९ लुम्बिनी प्रदेशस्तरीय छनौट प्रतियोगिता अन्तरगत महिला भलिबल, बुद्धिचाल, तेक्वान्दो र कपर्दी खेल सम्पन्न भएका छन ।
सिद्धेश्वर खेलमैदान सोमबार भएको महिला भलिबलमा रुकुम पुर्व विजयी भएको छ । फाईनल खेलमा रुकुम पुर्वले दाङलाई २-१ को सेटले पराजित गर्दै उपाधि चुमेको छ । यसैगरि खेलमा रुपन्देही तेस्रो भएको छ । रुपन्देहीले बाकेलाई २-० को सेटले पराजित गरेको थियो ।
जिल्ला खेलकुद विकास समिति परिसरमा सम्पन्न तेक्वान्दो खेलमा बाके प्रथम भएको छ । ९ महिला र १० पुरुष कोटाको लागि पुरुष-महिला काता र फाईट खेलमा टिम बाँकेले ९ स्वर्ण, ४ रजत र ७ कास्य पदक जित्दै प्रथम भएको हो । खेलमा रुपन्देही ६ स्वर्ण, २ रजत र ४ कास्य पदक जित्दै दोस्रो तथा रोल्पा २ स्वर्ण, ५ रजत र ३ कास्य पदक जित्दै तृतिय स्थान हासिल गरेको कार्यक्रम संयोजक राजकुमार पाण्डेले बताए ।
यता योगीकुटी लुम्बिनी फुटसल एरियामा भएको पुरुष/महिला कबठ्ठीमा नवलपरासीले उपाधि जितेको छ । पुरुषतर्फ फाईनल खेलमा नवलपरासीले बाकेलाई ५४-१८ अंकले पराजित गर्दै उपाधि हात परेको हो । खेलमा रोल्पा र रुपन्देही तृतिय भएको छ । महिलातर्फ नवलपरासीले गुल्मीलाई फाईनलमा ३४-२४ अंकले पराजित गर्दै उपाधि हात पारेको छ । खेलमा रुपन्देही र बर्दिया तृतिय भएको छ ।
प्रतियोगिता अन्तरगत पुरुष/महिला फुटबल एन्फा एकेडेमी बुटवलमा दोस्रो दिनको खेलहरु जारी छ । पुरुष फुटबलतर्फ बाके र बर्दिया फाईनलमा स्थान बनाएका छन ।
पहिलो सेमीफाइनलमा बाकेले दाङलाई पेनाल्टीमा शुटआउटमा ४-२ गोल अन्तरले पराजित गर्दै फाईनलमा स्थान बनायो । यसगरि बर्दियाले नवलपरासी बिचको दोस्रो सेमीफाइनल खेलको निर्धारित समयमा २-२ गोलको बराबरी भएपछि सडेन डेथमा बर्दिया ६-५ गोलले विजयी हुदै फाईनलमा पुगेको हो । मंगलबार उपाधिका लागि बाके र बर्दिया बिच फाईनल खेल हुनेछ ।
यसैगरि महिलातर्फ भने अन्तिम चारको टुगो लागेको छ । फाईनल खेलका लागि मंगलबार पहिलो सेमीफाइनल बाके र रुपन्देही तथा दोस्रो सेमीफाईनल खेल गुल्मी र बर्दिया बिच हुनेछ । प्रतियोगितामा पुरुषतर्फ १० र महिलातर्फ ६ टिमले भाग लिईरहेका छन ।
प्रदेश खेलकुद परिषद लुम्बिनीको आयोजनामा असोज २ गतेबाट १० गतेसम्म प्रदेश स्तरीय प्रतियोगिता तथा छनौट खेलहरु रूपन्देहीसहित नवलपरासी, कपिलवस्तु, दाङ, नेपालगंज र बर्दियामा जारी रहने प्रदेश खेलकुद विकास परिषद लुम्बिनीका सदस्यसचिव जयप्रकाश भट्टराई बताए । प्रतियोगितामा १२ जिल्लाका २ हजार ६ सय ५२ जना खेलाडीहरु, २ सय अफिसियल र ३ सय भोलिन्टियरहरुको सहभागीता रहने छन ।
प्रतिक्रिया