अनसनरत डा. गोविन्द केसीलाई थप उपचारका लागि सेनाको हेलिकप्टरबाट काठमाडौं ल्याइँदै

काठमाडौं । चिकित्सा क्षेत्रको सुधारसहित विभिन्न ७ वटा माग राखेर कैलालीमा आमरण अनसन बसिरहेका डा गोविन्द केसीको स्वास्थ्यअवस्था बिग्रिँदै गएपछि उनलाई काठमाडौं ल्याइने भएको छ ।

९ दिनदेखि अनसनरत केसीलाई नेपाली सेनाको हेलिकोप्टरबाट काठमाडौं ल्याइन लागेको हो । केसीको स्वास्थ्य थप बिग्रन नदिन काठमाडौं पठाउने तयारी भैरहेको कैलाली जिल्ला प्रशासन कार्यालयका सहायक जिल्ला अधिकारी यज्ञराज जोशीले बताए । यसअघि केसीको स्वास्थ्य बिग्रन थालेपछि सेती अञ्चल अस्पतालमा उपचार भैरहेको थियो । केसीको शरीरमा पोषणतत्व र पानीको असन्तुलन हुँदै गएको छ भने पेटमा कडा खालको अल्सर भएको आशंका गरिएको छ ।

डा. केसी अनसन बसेको दोस्रो दिनमै सेती प्रादेशिक अस्पतालको आईसीयूमा भर्ना गरिएको थियो । तर उनले औषधी सेवन गरेका थिएनन् । जसका कारण स्वास्थ्यअवस्था बिग्रँदै गएको हो ।
काठमाडौंमा केसीका प्रतिनिधि र सरकारी अधिकारीहरुबीच वार्ता आज पनि भैरहेको छ । वार्ता प्रधानमन्त्री तथा मन्त्रिपरिषद्को कार्यालय सिंहदरबारमा भैरहेको छ ।