बसको ठक्करबाट विद्यार्थीको मृत्युपछि धादिङको गजुरी तनाबग्रस्त

धादिङ । धादिङको गजुरीमा बसको ठक्करबाट एक जना विद्यार्थीको मृत्यु भएपछि स्थानीयबासिन्दाले प्रदर्शन गरेका छन् ।

काठमाडौंबाट गोरखा जाँदै गरेको बसले स्थानीय आदर्श माविका विद्यार्थीलाई ठक्कर दिएको थियो । ती विद्यार्थीको घटनास्थलमै मृत्यु भएको थियो । घटनापछि ठूलो संख्यामा उपस्थित भएका आक्रोशित स्थानीय बासिन्दा र विद्यार्थीले गजुरी बजार क्षेत्रमा प्रदर्शन गरेका छन् भने ठक्कर दिने बसलाई आगजनी गरेका छन् ।

राजमार्गमा भएको प्रदर्शनका कारण दुवैतर्फबाट आएका सवारी साधन गजुरीमै रोकिन बाध्य भएका छन् । प्रदर्शनका कारण लामो समयसम्म सडक अवरुद्ध हुँदा राजमार्गको दुवैतर्फ सवारी साधनको लामो लाइन लागेको छ ।