कालिकोटमा मलामी गएका १५ जना बेपत्ता

कालिकोट । कालिकोट जिल्लाको तिलागुफामा मलामी गएका १५ जना स्थानीय बेपत्ता भएका छन् । तिलगुफा नगरपालिका राँचुली गाउँका हेमराज शाहीको मलामी लगएका १५ स्थानीय बेपत्ता भएका हुन् ।

शनिबार मृत्यु भएका हेमराजको अन्त्येष्टीका लागि स्थानीय गाउँले आइतबार तिला नदी गएका थिए । वडाध्यक्ष परमबहादुर शाही पनि मलामी गएको बताइएको छ। तर, रातिसम्म मलामी गएकाहरु नफर्किएपछि गाउँलेले सोमबार बिहानै घटनाबारे प्रहरीलाई खबर गरेका थिए ।

वर्षा भइरहेकाले माथिबाट पहिरो खसेर उनीहरुलाई बगाएको आशंक गाउँलेले गरेको प्रहरीले बताएको छ । घटनाको खबर आउना साथ प्रहरी घटनास्थल तर्फ गइसकेको कालिकोटका प्रमुख जिल्ला अधिकारी रामहरि शर्माले बताए ।

ठाउँ ठाउँमा पहिरोले बाटो अवरुद्ध बनेकाले सदरमुकामबाट ४२ किलोमिटर दुरीमा रहेको राँचली पुग्न प्रहरीलाई पनि कठीनाइ भइरहेको उनले बताए । प्रहरी टोली त्यहाँ पुगेपछि मात्र घटनाको विस्तृत विवरण आउने उनले बताए ।

नाग्मगाड र खल्लागाड प्रहरी चौकीबाट दुई टोली घटनास्थलतर्फ गएका छन् । पहिरो गएकाले उनीहरु डोरजसहित त्यसतर्फ गाएका छन् ।