बबईमा नुहाउन गएका २ किशोरी बेपत्ता

दाङ । दाङमा स्थानीय बबई नदीमा नुहाउन गएका दुई किशोरी डुबेर बेपत्ता भएका छन् । आज दिउँसो नदीमा नुहाउन गएका २ जना किशोरी बेपत्ता भएको दाङ प्रहरीले जनाएको छ ।

बेपत्ता हुनेमा दाङको दङ्गीशरण गाउँपालिका–२ सिमलकुुनाकी १६ वर्षीया रमा शाही र सल्यानको दमाचौर घर भइ दङ्गीशरण–२ स्थित मामा घर आएकी १५ वर्षीया गोमा चन्द रहेको दाङ प्रहरी प्रमुख प्रहरी उपरीक्षक वीरबहादुर ओलीले जानकारी दिए ।

एसपी ओलीका अनुसार तुलसीपुर उपमहानगरपालिका–११ र दङ्गीशरण गाउँपालिका–२ को सिमानामा पर्ने उक्त नदीमा तीन किशोरी सङ्गै गएका थिए । सँगै गएका मध्य दङ्गीशरण–२ की १३ वर्षीया निरूता बस्नेत भने नदी छेउमै बसेकी र नुहान नदीमा पसेका दुबै जना नदेखिएपछि उनले हार गुहार माग्दै कराउन थालेपछि स्थानीयले प्रहरीलाई खबर गरेका थिए ।

तुलसीपुरबाट घटनास्थलमा पुगेको प्रहरी र स्थानीयले दुवैजनाको खोजी गरिरहेको छ ।