आगमी निर्वाचनमा अग्रगमन र प्रतिगमनबीचको राजनीतिक मुठभेड हुँदैछ : प्रचण्ड

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले गठबन्धन नबनेको भए देश दुर्घटनामा जाने निश्चित भएको बताएका छन् ।

सोमबार भएको बागमती प्रदेशस्तरीय कार्यकर्ता भेलालाई सम्बोधन गर्दै अध्यक्ष प्रचण्डले आफुहरुले गठबन्धन बनाएर अघि बढेकै कारण देश दुर्घटनाबाट जोगिएको बताएका छन् ।

केपी शर्मा ओलीको असंवैधानिक र प्रतिगमनकारी कदम विरुद्ध गठबन्धन बनेको बताउँदै प्रचण्डले आगामी निर्वाचनमा पनि गठबन्धनका उम्मेदवारहरुलाई विजयी बनाउन आग्रह गरे । ‘हामीहरु एकजुट नभएको भए देश दुर्घटनामा जाने निश्चित थियो । त्यसैले हामी प्रतिगमनलाई परास्त गर्न एकजुट भएका हौं ।’ उनले भने, ‘त्यसैले मंसिर ४ को निर्वाचनलाई सामान्य रुपमा नलिनुहोला ।’

देश र जनताका लागि एकअर्कालाई सहयोग गरेर अघि बढ्नुपर्ने बताएका प्रचण्डले अहिलेको गठबन्धनको सत्ताका लागि नभएको बताए ।देशमा प्रतिगमनविरुद्ध लड्न आवश्यक परेका बेलासम्म गठबन्धन रहने प्रचण्डको भनाइ छ ।

प्रचण्डले अहिले दुई प्रवृत्तिका शक्तिबीच राजनीतिक मुठभेड हुन लागेको दाबी गरे । निर्वाचनमा परिवर्तन विरोधी एमालेको पश्चगामी गठबन्धन र लोकतन्त्र र संविधानको रक्षार्थ बनेको आफुहरुको अग्रगामी गठबन्धनबीच राजनीतिक मुठभेड हुन लागेको उनले जिकिर गरे ।

प्रचण्डले केपी ओलीले संविधानलाई स्वीकार नै नगरेको दाबी गरे । उनले भने, ‘हामीले वाम गठबन्धन गरेपछि मात्रै थाहा भयो । संविधान स्वीकारेका रहेनछन् । आफू पावरमा आएपछि संविधान र गणतन्त्र उल्टाउने कसरत गरे ।’

अध्यक्ष प्रचण्डले युद्धकालमा आमनेसामने भएर लडेको सम्झेर अहिले मतदान गर्न आनाकानी गर्न नहुने बताए । प्रचण्डले युद्धकालमा माओवादी र कांग्रेस, माओवादी र नेकपा एकीकृत समाजवादी (तत्कालीन एमाले)बीच आमनेसामने भएकै आधारमा अहिले मतदान गर्न कठिन मान्नुनपर्ने बताए ।

१२ बुँदे सहमति, शान्ति प्रक्रिया हुँदै अहिलेको राजनीतिक अवस्थामा आएकाले कांग्रेसका नेता तथा कार्यकर्ताले माओवादी उम्मेदवारलाई मत दिन कठिन मान्नुनहुने प्रचण्डको भनाइ छ ।