बुटवल । गृहमन्त्री बालकृष्ण खाणले भयरहित वातावरणमा निर्वाचन गराउन सरकार प्रतिबद्ध रहेको बताएका छन् । प्रतिनिधिसभा र प्रदेशसभा निर्पाचन लक्षित लुम्बिनी प्रदेश स्तरिय सुरक्षा बैठकलाई सम्बोधन गर्दै गृहमन्त्री खाणले जनताको अपेक्षा सुख, शान्ति र समृद्दी रहेको र त्यो अपेक्षा पुरा गर्न निर्वाचन अपरिहार्य रहेको बताए ।
उनले सरकारले कसैलाई काखा र पाखा नगर्ने स्पष्ट पार्दै निर्वाचन प्रक्रियाबाट बाहिर रहेका दलहरुलाई पनि निर्वाचन प्रक्रियामा सहभागी हुन आग्रह गरे । उनले निर्वाचनमा सहभागी हुने आम नागरिकलाई भ्रममा नपार्न तथा निर्वाचन बिथोल्ने खालका गतिबिधि नगर्न समेत चुनावमा सहभागी नहुने घोषणा गरेका दलहरुलाई आग्रह गरे । उनले कुनै दल वा समूहका नाममा निर्वाचन खल्बलाउने र जनताले आफ्ना नेता चुन्ने अधिकार खोसिदिन नपाइने जनाए । ‘नेपाल सरकारले कुनैपनि राजनीतिक दलहरु प्रति आग्रह र पूर्वाग्रह राखेको छैन ।’ उनले भने, ‘नेपाली भूमिमा संचालनमा रहेका, जन्मिएका, हुर्किएका सबै दलहरु सरकारका लागि बराबर छन् ।’
गृहमन्त्री खाणले दलहरुसँग भएका सहमतिहरुलाई कार्यान्वयन गर्न सरकार प्रतिबद्ध रहेको उल्लेख गर्दै कतिपय मागहरुको सम्बोधन भइसकेको र कतिपय मागहरु पुरा हुने प्रक्रियामा रहेको पनि जनाए । संविधान संशोधन बाहेकका मागहरुमा सरकारले माग सम्बोधनको कार्य थालिरहेको बताउँदै उनले ऐन र कानुनमा सुधार गरि सबै दलहरुलाई निर्वाचनमा आउने वातावरण बनाउन सरकार इमान्दार रहेको बताए । ‘जनताले आफ्नो अधिकार प्रयोग गरेर आफूले चाहेको दल र नेता जिताउने र उनीहरुको माध्यमबाट प्राप्त अधिकार संरक्षण गर्ने, विकासको ढोका खोल्ने र जीवनस्तर फेर्ने अवसर हो,’ उनले भने, ‘त्यसैले कुनै दल वा समूहलाई निर्वाचन विथोल्ने र नागरिकको अधिकार खोस्ने अधिकार छैन ।’
कार्यक्रममा लुम्बिनी प्रदेशका मुख्यमन्त्री कुलप्रसाद केसी, गृहसचिव बिनोद प्रताप सिंह, नेपाली सेनाका रथी सरोज प्रताप राणा, नेपाल प्रहरीका प्रहरी महानिरक्षिक धिरज प्रताप सिंह, शसस्त्र प्रहरीका महानिरक्षिक राजु अर्याल लगायतले सम्बोधन गरेका थिए ।
प्रतिक्रिया