बुटवल । रुपन्देही-२ बाट प्रतिनिधिसभा सदस्यका लागि स्वतन्त्र उम्मेदवारी दिएका रुपसिंह थापाले अहिले बनिरहेको गठबन्धनलाई ठगबन्धनको संज्ञा दिएका छन् ।
थापाले शुक्रबार बुटवलमा आयोजना गरेको पत्रकार सम्मेलनमा बोल्दै अहिलेको गठबन्धन जनताको काम गर्नुभन्दा पनि आफ्नो स्वार्थका लागि गठबन्धन भएकाले उक्त गठबन्धन ठगबन्धन रहेको बताए ।
निर्वाचन पछि संसदमा जाँदा बरु देशलाई कसरी समृद्ध बनाउने विषयमा गठबन्धन गरेर अघि बढ्नुपर्नेमा अहिले आफ्नो जीतको स्वार्थलाई मात्र हेरेर ठगबन्धन गरेको आरोप उनले लगाए ।
साथै थापाले अहिले देशमा परिर्वतनको आशा नयाँ अनुहारबाट हुने आशा मतदाताले गरेको भन्दै आफु मतदाताको घरदैलोमा पुग्दा सकारात्मकलाई प्रक्रिया पाएको बताए । साथै उनले आफ्नो जीत निश्चित भएको पनि दावी गरे ।
सोही पत्रकार सम्मेलनमा थापाले आफुलाई हाम्रो नेपाली पार्टीले समर्थन गर्ने भएको बताए । उक्त पार्टीको लौरो चिन्ह लिएर उम्मेद्वार बनेका कमल भुसाल (निकोलस)को उम्मेदवारी खारेज भएपछि थापालाई सहयोग गर्ने सहमति भएको लुम्बिनी प्रदेश संयोजक इसा खड्काले बताइन ।
संयोजक खड्काले स्वतन्त्रहरुलाई नै जिताउने आफूहरुको अभियान भएकाले थापालाई मतदान गर्न आग्रह गरिन ।
प्रतिक्रिया