सत्ताको लुछाचुँडीमा लागे गठबन्धनलाई आफ्नो साथ समर्थन रहँदैन : घनश्याम भुसाल

बुटवल । बामपन्थी नेता एवं रुपन्देही क्षेत्र नम्बर १ बाट प्रतिनिधिसभाका लागि स्वतन्त्र उम्मेदवार बाम लोकतान्त्रिक गठबन्धनका नेताहरु सत्ताको लुघाचुँडी नाफाघाटाको बाटोमा हिँडे आफ्नो समर्थन नरहने बताएका छन् ।

एबीसी न्युजका लागि पत्रकार शुभशंकर कंडेलसंगको कुराकानीमा नेता भुसालले गठबन्धन कार्यक्रम र लक्ष्य प्राप्तिका लागि हुनु पर्ने बताए ।

उनले गठबन्धन निश्चित कार्यक्रम, लोकतन्त्र, संबिधानको रक्षा र देश बनाउने रणनीतिका साथ प्रस्तुत भए आफ्नो साथ र योगदान रहने बताउँदै सरकार बनाउने, ढाल्ने र फेरि सरकारका लागि लुछाचुँडी गर्ने खेलमा लागे आफ्नो विरोध सहित साथ नरहने बताए । विगतका जनआन्दोलनका उपब्धिहरुलाई दलहरुले रक्षा गर्न नसकेको टिप्पणी गर्दै नेपाली राजनीतिमा ओली प्रबृत्ति देखिएपछि युवाहरुमा राजनीति र दलहरु प्रति बितृष्णा बढेको बताए । एमाले अध्यक्ष केपी ओलीको गतिबिधिले युवाहरुमा नो नट अगेनको भावना बढेको बताउँदै भुसालले ओली प्रबृत्ति रोक्न नसके मुलुकले नसोंचेको नतिजा बेहोर्नु पर्ने चेतावनी दिए ।

एमाले परित्याग गरेर स्वतन्त्र उम्मेदवार भएका भुसालले आफुसँगै एमाले नछाडेका उमालेका १० बुँदेका पक्षधर नेताहरुको भने प्रसंशा गरे । एमालेमै अडिएका १० बुँदेका पक्षधर नेताहरुले अध्यक्ष ओलीले चालेको कदमको कतै समर्थन सहमति नजनाएको उल्लेख गर्दै ओलीले गरेका गतिबिधिको प्रतिबाद गर्दै पार्टीमा रहेको चर्चा गरे ।

उनले आफु अकबरे सुन जस्तै नेता नभएर आफ्ना पनि कमी कमजोरी रहेको बताउँदै त्यस्ता कमीलाई समर्थकहरुले आलोचना गरेर सच्याउन सहयोग गर्न पनि उनले आग्रह गरे । रुपन्देही १ का जनताले आफुलाई कम्तीमा भ्रष्टाचार नगर्ने, सहि विचार र सिद्धान्त बोक्ने र जनतको एजेण्डा बोकेर हिँड्ने नेताकारुपमा लिएको दाबी गर्दै त्यही विश्वासले आफुले चुनावमा सफलता प्राप्त गर्ने पनि बताए । उनले चमत्कारिकरुपमा एमाले भित्र रहेका समर्थक र कार्यकर्ताहरुको मत आफुले पाउने पनि दाबी गरे ।