बुटवल । नेपाल कम्युनिष्ट पार्टी (संयुक्त) का कार्यवाहक अध्यक्ष घनश्याम भुसालले वर्तमान राजनीतिक परिस्थितिमा निर्वाचन अपरिहार्य बनेको बताएका छन् । बुटवलमा आयोजित पत्रकार सम्मेलनमा बोल्दै उनले यो निर्वाचन नेपाली जनताको प्रत्यक्ष चाहनाभन्दा पनि संवैधानिक तथा लोकतान्त्रिक प्रक्रियाबाट सिर्जित असाधारण परिस्थितिका कारण हुन लागेको स्पष्ट पारे ।
नेपाल कम्युनिष्ट पार्टी (संयुक्त)का कार्यवाहक अध्यक्ष भुसालले मुलुकले पछिल्लो समय सामना गरेका विध्वंसकारी घटनाबाट गम्भीर शिक्षा लिनुपर्ने आवश्यकता औंल्याए । उनले राजनीतिक दलहरूको कमजोरी र गैरजिम्मेवारीपनको समीक्षा गरी राष्ट्रिय संकल्प गर्नुपर्नेमा जोड दिए । तर त्यसो गर्नुको सट्टा निर्वाचनतर्फ केन्द्रित हुनु समस्या समाधानभन्दा पनि समस्या लुकाउने प्रयास भएको उनको टिप्पणी थियो ।
उनले गौरीबहादुर कार्की नेतृत्वको आयोगजस्ता संरचनाले पनि मुलुकको वास्तविक समस्या उजागर गर्न नसकेको बताए । यस्तो अवस्थाले नेपाल भूराजनीतिक दबाबमा रहेको सानो राष्ट्रका रूपमा झन् कमजोर बन्दै गएको उनको भनाइ थियो ।
भुसालले निर्वाचनपछि पनि पुरानै राजनीतिक प्रवृत्ति दोहोरिने खतरा रहेको उल्लेख गर्दै परनिर्भर विकास मोडेलले रोजगारी सिर्जना गर्न नसक्ने, विचौलियातन्त्र झन् बलियो हुने र सुशासन स्थापित हुन नसक्ने चेतावनी दिए ।
उनले नेपाली राजनीतिलाई आत्मनिर्भर र मौलिक बनाउनुपर्नेमा जोड दिँदै पश्चिमेली मोडेलको अन्धानुकरणभन्दा नेपाली समाजअनुकूल विकासको मार्ग अवलम्बन गर्नुपर्ने धारणा राखे। मुलुकको मूल समस्या परनिर्भर विकास, दलाल पुँजीवाद र विचौलियातन्त्र रहेको उल्लेख गर्दै उनले बौद्धिक वर्ग र राजनीतिकर्मीलाई यी विषयमा गम्भीर बहस गरी निकास खोज्न आह्वान गरे ।
भुसालले निर्वाचनलाई लोकतान्त्रिक प्रक्रिया र अवसरका रूपमा स्वीकार गरे पनि निर्वाचन मात्रले मुलुकको गहिरो संकट समाधान गर्न नसक्ने बताए । उनले वर्तमान अवस्थाबाट मुलुकलाई निकास दिन व्यापक पुनर्विचार, नीतिगत सुधार र दीर्घकालीन दृष्टिकोण आवश्यक रहेको उल्लेख गरे ।
प्रतिक्रिया