माओवादीले भन्यो : अहिलेको गठबन्धनको विकल्पबारे सोचेका छैनौं

काठमाडौं । नेकपा माओवादी केन्द्रको पदाधिकारी बैठकमा आज पनि चुनावको समीक्षा र नयाँ सरकारबारे छलफल भएको छ।

शनिबारदेखि सुरु भएको बैठकमा नेताहरुले बोल्ने क्रम नसकिएपछि आज पुनः बैठक बसेको थियो । आजेका बैठकमा पनि चुनावी समीक्षा र सरकारबारे सामान्य रूपमा छलफल गरिएको महासचिव देव गुरुङले बताएका छन् ।

गुरुङले गठबन्धनको विषयमा पार्टी नसोचिसकेको बताए । उनले अहिलेकै गठबन्धनबाट नयाँ सरकार बनाउने पहिलो प्रयास रहने स्पष्ट पारे । गुरुङले भने, ‘अहिलेको गठबन्धनलाई तोड्ने वा फोड्ने कुरा भएको छैन। आपसी समझदारीलाई जोड दिने हो। अहिलेको गठबन्धनको विकल्पबारे सोचेका छैनौं ।’ उनले पार्टीको बैठकमा सरकारको बारेमा उल्लेखनीय रुपमा विषय प्रवेश नै नभएको दाबी गरे ।

गठबन्धनको बैठक गरेर चुनावको समीक्षा र सरकार गठनबारे समग्रमा छलफल हुने उनले बताए ।

भोलि सोमबार सत्ता गठबन्धनमा रहेका दलहरूको बस्ने तय भएको छ। गुरुङले सरकारको नेतृत्वमा आफूहरूको दाबी स्वाभाविक हुने बताए । संविधान निर्माणदेखि अहिलेसम्मको राष्ट्रिय राजनीतिमा पार्टीको भूमिकाका कारण सरकारको नेतृत्वमा आफुहरुको दाबी गर्नु स्वाभाविक रहेको उनले बताए ।