बुटवल । नेपाली कांग्रेस रुपन्देहीले प्रदेशको स्थायी संरचना नबन्दै राजधानी दाङमा सार्न लागेको भन्दै मुख्यमन्त्री कार्यालय बुटवलमा ज्ञापनपत्र बुझाएको छ ।
काम चलाउ सरकारले कर्मचारी आवास, प्रदेशसभाका सांसद बस्ने पूर्वाधार नभएको स्थानमा जबर्जस्ती मन्त्रालय लैजाँदा प्रतिकूल असर पर्ने भन्दै राजधानी हतारमा नसार्न माग गरेको हो ।
कांग्रेस रुपन्देहीका सभापति रामकृष्ण खाँणको नेतृत्वमा गएको टोलीले मुख्यमन्त्री कार्यालयका कार्यवाहक सचिवलाई ज्ञापनपत्र बुझाउँदै राजधानी सार्न हतार नगर्न भनिएको हो ।
पूर्वाधार बिना राजधानी सार्ने भन्दा पनि भौतिक पूर्वाधार निर्माणमा ध्यान दिन र नवनिर्वाचित प्रदेशसभाबाट बन्ने सरकारलाई कार्यभार सुम्पिन कांग्रेसको आग्रह छ ।
यस अघि एमालेको तर्फबाट नव निर्वाचित प्रदेशसभा सदस्यहरु लिला गिरी, भुमिश्वर ढकाल, भोजप्रसाद श्रेष्ठ र तुलसी चौधरीले प्रेस वक्तब्य प्रकाशित गर्दै तत्काल राजधानी सार्ने काम बन्द गर्न माग गरेका थिए । आजै एमाले रुपन्देहीका अध्यक्ष तेजेन्द्र केसीले पनि विज्ञप्ति प्रकाशित गर्दै पूर्वाधार बिना राजधानी नसार्न माग गरेका छन् ।
प्रतिक्रिया