काठमाडौं । कतारमा जारी विश्वकप फुटबलमा पूर्वविजेता स्पेनलाई हराउँदै मोरोक्को क्वार्टरफाइनलमा प्रवेश गरेको छ ।
गोलकिपरले स्पेनको तर्फबाट प्रहार गरिएको तीन पेनाल्टी लगातार रोकेपछि मोरोक्कोले पहिलोपटक विश्वकपको अन्तिम आठमा स्थान सुरक्षित गर्यो ।
कतारको एजुकेसन सिटी रंगशालामा जारी खेलको निर्धारित ९० मिनेट र इन्जुरी टाइममा पनि दुवै टिमबाट गोल हुन नसकेपछि खेल अतिरिक्त समयमा धकेलिएको थियो ।
निर्धारित समय र अतिरिक्त समयको खेल गोलरहित बराबरीमा सकिएपछि पेनाल्टी सुटआउटमा पुगेको खेलमा मोरोक्कोले बाजी मारेको हो ।
स्पेनबाट पहिलो प्रहारका लागि पाब्लो साराबिया आएका थिए । उनको प्रहार गरेको पेनाल्टी पोस्टमा लागेर फर्कियो । त्यसपछि स्पेनका कर्लोस सोलर र सर्जियो बुस्केटको प्रहार पनि मोरोक्कोका गोलकिपरले बचाए ।
मोरोक्कोका अब्देलहमिद साबिरी, हाकिम जियाच, र अक्रफ हाकिमीले गोल गरे । मोरोक्कोका बडर बेनाउनको प्रहार स्पेनका गोलकिपर उनाई सिमोनले बचाए पनि टिमको हार टार्न सकेनन् ।
यो जितसँगै मोरोक्को विश्वकपको इतिहासमा क्वार्टरफाइनल खेल्ने चौथो अफ्रिकी टिम बनेको छ । यसअघि अफ्रिकाबाट घाना, सेनेगल र क्यामरूनले मात्र विश्वकपको क्वार्टरफाइनल खेलेका थिए ।
यता सन् २०१० मा विश्वकपको उपाधि जितेको स्पेन भने लगातार दोस्रो पटक विश्वकपको प्रिक्वार्टरफाइनलबाट बाहिरिएको हो । स्पेन सन् २०१८ को विश्वकपमा पनि रूससँग अन्तिम-१६ को खेलमा पेनाल्टी सुटआउटमै पराजित हुँदै बाहिरिएको थियो ।
मोरोक्कोले अब सेमिफाइनल प्रवेशका लागि पोर्चुगल र स्विट्जल्यान्डबीचको विजेतासँग खेल्नेछ ।
मोरोक्को समूह ‘एफ’को विजेताको रूपमा र स्पेन समूह ‘ई’को उपविजेताको रूपमा प्रिक्वार्टरफाइनल आएका थिए ।
प्रतिक्रिया