बुटवल । लुम्बिनी प्रदेशमा सम्पन्न राष्ट्रियसभा सदस्य निर्वाचनमा नेपाली कांग्रेस र नेकपा (एमाले) गठबन्धनका साझा उम्मेदवारहरू विजयी भएका छन् ।
आइतबार तीन पदका लागि भएको निर्वाचनमा खुलातर्फ चन्द्रबहादुर केसी, महिलातर्फ रामकुमारी झाँक्री र अपाङ्गता/अशक्ततर्फ वासुदेव घिमिरे (जंगली) विजयी भएको प्रदेश निर्वाचन कार्यालय लुम्बिनीका सूचना अधिकारी गेहेन्द्र कुँवरले जानकारी दिएका छन् ।
विजयी उम्मेदवारहरूमध्ये चन्द्रबहादुर केसी र वासुदेव घिमिरे नेपाली कांग्रेसका तर्फबाट उम्मेदवार थिए भने महिलातर्फकी रामकुमारी झाँक्री नेकपा (एमाले) की उम्मेदवार हुन् । गठबन्धनको साझा रणनीतिअनुसार तीनै उम्मेदवारलाई अघि सारिएको थियो ।
निर्वाचनमा कुल ३०० मतदाता रहेकामा २८६ मत खसेको निर्वाचन कार्यालयले जनाएको छ । प्रदेशसभा सदस्य र स्थानीय तहका प्रमुख तथा उपप्रमुख/अध्यक्ष र उपाध्यक्षहरू मतदाता रहेका थिए ।
लुम्बिनी प्रदेशबाट हाल नेकपा (एमाले)का गोपाल भट्टराई, राष्ट्रियसभा उपाध्यक्ष विमला घिमिरे तथा नेकपा (माओवादी केन्द्र)का जगप्रसाद शर्मा ‘अपार’ राष्ट्रियसभा सदस्य रहेका छन् । उनीहरूको पदावधि आउँदो फागुन २० गते सकिँदैछ ।
नवनिर्वाचित सदस्यहरूले उक्त मितिपछि राष्ट्रियसभामा लुम्बिनी प्रदेशको प्रतिनिधित्व गर्नेछन् ।
प्रतिक्रिया