काठमाडौं । निर्धारित समयभन्दा आधा घन्टा ढिलो भइसक्दा पनि नेपाली कांग्रेस संसदीय दलको नेताका लागि अझै मतदान सुरु हुन सकेको छैन ।
सिंहदरबारस्थित संसदीय दलको कार्यालयमा बुधबार बिहान ८ देखि १० बजेसम्म मतदानको समय निर्धारण गरिएको थियो ।
तर, मतदान केन्द्रमा मतदातालाई मोबाइल लैजान दिने कि नदिने विषयमा निर्वाचन समितिमा रहेका संस्थापन र इतर समूहबीच सहमति नजुट्दा मतदान हुन नसकेको हो ।
निर्वाचन समितिमा रहेका संस्थापन पक्षले बुथमा मोबाइल लैजान दिनुपर्ने बताएको छ भने इतर समूहले लैजान नहुने बताएको छ ।
निर्वाचन समितिका सदस्य प्रकाश रसाइलीले मतदातालाई बुथमा मोबाइल लैजान दिन नहुने बताए ।
संसदीय दलको नेताका लागि प्रधानमन्त्रीसमेत रहेका कांग्रेस सभापति शेरबहादुर देउवा र महामन्त्री गगन थापा प्रतिस्पर्धामा छन् ।
निर्वाचन समितिमा भीष्मराज आङ्देम्बे संयोजक, पुष्पा भुसाल र प्रकाश रसाइली सदस्य छन् ।
प्रतिक्रिया