बुटवल । नयाँ सत्ता समिकरण अन्तर्गत बनेको सत्ता गठबन्धनमा आवद्ध दलहरुले आज लुम्बिनी प्रदेशमा प्रदेश सरकार गठनका लागि बहुमत सहितको दाबी पेश गर्ने भएका छन् ।
दलहरुले केन्द्रीय निर्णय अनुसार एमाले प्रदेश संसदीयदलका नेता लिला गिरीलाई मुख्यमन्त्रीमा नियुक्त गर्न प्रदेश प्रमुख अमिक शेरचन समक्ष दाबी पेश गर्ने भएका हुन् ।
प्रदेश प्रमुख शेरचनले बहुमतीय सरकार गठनका लागि दिएको समयसीमाको एकदिन अगाडि नै दलहरुले दावी पेश गर्न लागेका हुन् । प्रदेश प्रमुख अमिक शेरचनले पुस २७ गते ४ बजेसम्म सरकार गठनका लागि समय दिएका थिए ।
सत्ता गठबन्धनमा आवद्ध दलको सोमबार बसेको बैठकले आज (मंगलबार) नै बहुमत सांसदको हस्ताक्षरसहितको दावी पेश गर्ने निर्णय गरेका थिए । नागरिक उन्मुक्ति पार्टी बाहेकका सत्ता गठबन्धनमा आवद्ध दलहरुको बैठकले गिरीलाई मुख्यमन्त्रीमा नियुक्त गर्न दाबी पेश गर्ने निर्णय गरेका थिए ।
सम्भवत प्रदेश प्रमुख शेरचनले आजै लुम्बिनीमा एमाले संसदीय दलका नेता एवं पूर्वमन्त्री लीला गिरीलाई मुख्यमन्त्री पदमा नियुक्त गर्ने छन् । यद्देपी माओवादी केन्द्रका संसदीयदलका नेता जोखबहादुर महराले केन्द्रीय निर्णय प्रति असहमति जनाउँदै आधा आधा कार्यकाल सरकारको नेतृत्व गर्न पाउनु पर्ने माग गरेको माओवादी स्रोतले दाबी गरेको छ । यस अघि सत्ता गठबन्धनका शिर्ष नेताहरुले लुम्बिनीमा ५ वर्षकै लागि एमालेले सरकार चलाउने सहमति गरेका थिए ।
सोमबार दाङको देउखुरीमा एमाले संसदीय दलका नेता लीला गिरीसहित सत्तापक्षीय गठबन्धनका नेताहरूको बैठकले मंगलबार ४ बजे सरकार गठनका लागि बहुमतसहितको दाबी पेस गर्ने सहमति गरेका थिए ।
सोमबारको बैठकमा एमाले, माओवादी केन्द्र, राप्रपा, जसपा र जनमतका नेताहरूको उपस्थिति रहेको बैठकमा सहभागी एमाले सांसद भूमिश्वर ढकालले जानकारी दिए । उनले मंगलबार कम्तीमा ४९ सदस्यको समर्थनसहित सरकार गठनका लागि दाबी पेस गरिने बताए ।
लुम्बिनी प्रदेशमा एमालेका २९, माओवादी केन्द्रका १०, राप्रपाका ४, जसपा र जनमतका ३-३ सिट छन् । नागरिक उन्मुक्तिसंग ४ सिट र स्वतन्त्र २ जना सांसद रहेका छन् । ८७ सदस्यीय प्रदेशसभामा बहुमतका लागि ४४ सीट आवश्यक पर्छ । प्रदेशमा कांग्रेसका २७, लोसपाका ३ र नेकपा एकीकृत समाजवादी र राष्ट्रिय जनमोर्चाका १-१ सदस्य छन् । ती दलहरुले सरकार गठन बारे कुनै निर्णय सार्वजनिक गरेका छैनन् ।
प्रतिक्रिया