बाँकेमा दादुरा संक्रमितको संख्या ११५ पुग्यो, १ जनाको मृत्यु, २ जना गम्भीर

नेपालगन्ज । बाँकेको नेपालगन्ज र यस आसपासमा फैलिएको दादुरा महामारीबाट संक्रमित हुनेको संख्या ११५ जना पुगेको छ । यही पुस १२ गतेदेखि फैलिएको दादुरा माहामारीबाट संक्रमित हुने बालबालिकाको संख्या ११५ पुगेको छ भने माहामारीबाट एक जनाको ज्यान गएको छ ।

नेपालगञ्ज उपमहानगरपालिकाका वडा नम्बर–१, ३, ५, ७, ८, ९, १०, ११, १४, १५, १६ र २२ मा गरी १२ वटा वडाका ११३ जनामा संक्रमण देखिएको हो । बाँकेको खजुरा २ को गुराँसपुरमा २ जनामा संक्रमण देखिएको छ । आज मात्रै थप ५ जना दादुरा प्रभावित बालबालिका भेटिएका हुन् ।

उपमहानगरको स्वास्थ्य महाशाखाका अनुसार संक्रमित मध्ये दुई बालबालिकाको अवस्था गम्भीर छ । वडा नम्बर ५ का उनीहरूको भेरी अस्पतालमा उपचार भइरहेको छ ।

हाल सम्म ५८ जना संक्रमितलाई होम आइसोलेसनमा राखिएको र ५२ जना निको भइसकेको स्वास्थ्य कार्यालय बाँकेका अधिकृत नरेशबाबु श्रेष्ठले बताए ।

दादुरा विरुद्धको खोप अभियान शुरु गरेको आज छैठौ दिनसम्म नेपालगञ्जका ७१६३ जनालाई खोप लगाइएको स्वास्थ्य कार्यालय बाँकेका खोप फोकल पर्सन समेत रहेका श्रेष्ठले बताए । ६ महिनादेखि १५ वर्षसम्मका बालबालिकालाई खोप लगाइरहेको उनले जानकारी दिए ।