बुटवल । रुपन्देहीको कोटहीमाई गाउँपालिका-३ त्रिलोकपुरमा गोली चलेको घटना अनुसन्धानका लागि प्रहरीले एक भारतिय नागरिक सहित तीन जनालाई नियन्त्रणमा लिएको छ ।
रुपन्देही प्रहरीले भारत महाराजगञ्जका २५ वर्षीय श्रीप्रसाद यादव सहित कोटहीमाईका स्थानीय १८ वर्षीय दिलिप यादव र २१ वर्षीय विजय भरलाई नियन्त्रणमा लिएको जिल्ला प्रहरी कार्यालय रुपन्देहीले जनाएको छ ।
प्रहरीका अनुसार बिहीबार बेलुका ७ बजेतिर गोली पड्केको जस्तो आवाज सुनिएको खबर पाएपछि प्रहरी इलाका प्रहरी कार्यालय मझगाँउबाट प्रहरी घटनास्थल त्रिलोकपुरमा पुगेको थियो । प्रहरीले सो स्थानबाट कटुवा पेस्तोलमा लाग्ने जस्तो देखिने एक राउण्ड गोली, पड्केको गोलीको खोका, दुई थान नेपाली नम्बर प्लेट लु १३ प ९४१६ र लु ४२ प ५५७२ को मोटरसाइकल २ थान र एउटा भारतीय नम्बर प्लेट UP53BZ9157 को मोटरसाईकल बरामद गरेको छ ।
घटनाबारे अनुसन्धान भइरहेको जिल्ला प्रहरी कार्यालय रुपन्देहीले जनाएको छ ।
प्रतिक्रिया