नागरिकता लिन रवि लामिछाने जिल्ला प्रशासन काठमाडौंमा

काठमाडौं । अदालतको आदेशमा अनागरिक बनेका राष्ट्रिय स्वतन्त्र पार्टी (रास्वपा)का नेता रवि लामिछाने नेपाली नागरिकताको प्रमाणपत्र लिन जिल्ला प्रशासन कार्यालय काठमाडौंमा पुगेका छन् ।

शुक्रबार साँझबाट अनागरिक बनेका लामिछाने आज कार्यालय खुले लगत्तै नागरिकता लिन जिल्ला प्रशासन पुगेका हुन् ।

अमेरिकी नागरिकता त्यागेपछि नेपाली नागरिकताको पुनःप्राप्तिका लागि कानुन बमोजिम प्रक्रिया पूरा नगरेको ठहर गर्दै सर्वोच्च अदालतले गत शुक्रबार रवि लामिछानेले प्रयोग गरेको नागरिकता खारेज गरिदिएको थियो ।

उनका समर्थक पनि उनीसँगै जिल्ला प्रशासन कार्यालय पुगेपछि अहिले जिल्ला प्रशासन कार्यालय काठमाडौं परिषरमा ठूलो भीड जम्मा भएको छ ।

नागरिकता मुद्दामा विपक्षमा फैसला आएसँगै उनको उपप्रधानमन्त्री तथा गृहमन्त्री र राष्ट्रिय स्वतन्त्र पार्टी (रास्वपा) को सभापति पद स्वतः रिक्त भएको थियो ।

अदालतको फैसलाकै आधारमा रवि अमेरिकी नागरिकता त्यागेपछि नेपाली नागरिकताको पुनःप्राप्तिका लागि कानुन बमोजिम प्रक्रिया पूरा गर्न जिल्ला प्रशासन कार्यालय काठमाडौंमा पुगेका हुन् ।