भुतखोलामा डुबेर एकजनाको मृत्यु

बुटवल । सिद्धार्थ राजमार्ग अन्तर्गत पाल्पा तिनाउ गाँउपालिका २ भुतखोलामा घुम्न पुगेका एकजनाको भुतखोलामा डुबेर मृत्यु भएको छ । राजमार्गकै छेउमा पर्ने तिनाउको पर्यटकीय स्थल भुत खोलामा फोटो खिच्ने क्रममा भुतखोलामा डुबेर आइतबार दिउँसो पश्चिम नवलपरासीका २४ वर्षीय अजिम पठानको ज्यान गएको प्रहरीले जनाएको छ ।

रुपन्देहीको सिद्धार्थनगर(४ का २२ वर्षीय साथी दिपक कुमार बानियासँगै घुम्न गएका पठानले फोटो खिच्न बनाइएको सेल्फी जोनको पुलमा बसेर फोटो खिच्ने क्रममा ढुँगामा चिप्लेर खोलामा खसेका थिए । खोलाको पानी जमेर बनेको तलाउमा पठान डुबे लगत्तै स्थानीयले प्रहरीलाई खबर गरेका थिए ।

प्रहरी चौकी दोभानबाट खटिएको प्रहरी टोलीले उद्धार गरी उपचारको लागि लुम्बिनी प्रादेशिक अस्पताल बुटवल ल्याइएकोमा अस्पताल पुगे लगत्तै चिकित्सकले मृत घोषणा गरेका थिए । घटना सम्बन्धमा थप अनुसन्धान शुरु गरिएको प्रहरीले जनाएको छ ।