काठमाडौं । बिहिबार स्थगित उच्चस्तरीय राजनीतिक संयन्त्रको बैठक प्रधानमन्त्री निवास बालुवाटारमा सुरु भएको छ । हिजो दिउँसो ३ बजेको लागि बोलाइएको संयन्त्रको स्थगित बैठक आज शुरु भएको हो ।
बैठकमा प्रधानमन्त्री प्रचण्ड, एमाले अध्यक्ष केपी ओली, सरकारबाट बाहिरिएको राष्ट्रिय स्वतन्त्र पार्टीका अध्यक्ष रवि लामिछाने र राष्ट्रिय प्रजातन्त्र पार्टीका अध्यक्ष राजेन्द्र लिङ्देन सहभागी छन् ।
सरकारबाट बाहिरिएको रास्वपाले सरकारबाट बाहिरिने क्रममा उच्चस्तरीय संयन्त्रको बैठक बोलाउन माग गरेको थियो । रास्वपाले सरकारलाई समर्थन जारी राख्दै गृहमन्त्रीका सम्बन्धमा संयन्त्रले निर्णय गर्नु पर्ने बताउँदै आएको छ ।
बिहिबार संयन्त्रको बैठक बस्ने भनिएपनि बैठक स्थगित गरेर प्रधानमन्त्री प्रचण्ड र संयन्त्रका संयोजक तथा नेकपा एमालेका अध्यक्ष ओलीबीच प्रधानमन्त्री तथा मन्त्रिपरिषद्को कार्यालय सिंहदरबारमा भेटवार्ता भएको थियो ।
प्रतिक्रिया