बुटवल । स्थापना दिवसको अवसरमा लुम्बिनी प्रदेश सरकारले आज विभिन्न कार्यक्रम गरी मनाउँदै छ । मुलुक संघीय संरचनामा गएपछि लुम्बिनी प्रदेश सरकार स्थापना भएको दिन हो, आज । यो अवसरमा प्रदेश सरकारले स्थापना दिवस मनाउने भएको हो ।
आज दिउँसो राप्ती उपत्यका देउखुरीमा औपचारिक समारोहको आयोजना गरेर दिवस मनाउने तयारी प्रदेश सरकारले गरेको छ । मंगलबार बसेको प्रदेश मन्त्रिपरिषद्को बैठकले प्रदेश सरकार स्थापना दिवसलाई भव्य बनाउने निर्णय गरेको सरकारका प्रवक्ता तथा खानेपानी, ग्रामीण तथा सहरी विकास मन्त्री चेतनारायण आचार्यले जानकारी दिए । प्रदेश स्थापना दिवसको अवसरमा प्रदेशभर सार्वजनिक बिदा दिइएको छ । स्थानीय झाँकी प्रदर्शन सहित प्रदेश सरकारले घोषणा गरेको बिभिन्न मानपदवी तथा सम्मानबाट विभूषित गरिने प्रदेश सरकारले कार्यक्रम तय गरेको छ ।
देउखुरी उपत्यकामा गरिने विशेष समारोहको लुम्बिनी प्रदेश प्रमुख अमिक शेरचनले उदघाटन गर्दैछन । प्रदेश राजधानी बुटवलमा दाङ स्थानान्तरण गरेपछि प्रदेश सरकारले देउखुरीमा दोस्रो पटक स्थापना दिवस मनाउन थालेको हो ।
२०७४ साल फागुन ३ गते लुम्बिनीमा पहिलो पटक सरकार गठन भएको थियो । यो पाँच वर्षको अवधिमा प्रदेशमा तीनवटा सरकार बनेका छन् । मुख्यमन्त्री लीला गिरीले प्रदेशमा १० मन्त्रालय बनाएका छन् ।
२०७८ साउन २७ गते तत्कालीन एमाले नेता शंकर पोखरेल नेतृत्वको सरकार विस्थापन गरी कुलप्रसाद केसी मुख्यमन्त्रीमा नियुक्त भएसँगै लुम्बिनीमा मन्त्रालयको संख्या बढाइएको थियो । २०७४ को निर्वाचनपछि मुख्यमन्त्रीले अर्थ मन्त्रालय आफैँसँग राखेर पाँचवटा मन्त्रीसहितको मन्त्रिपरिषद् बनाए ।
पछि राजनीतिक उत्तारचढावसँगै नौ मन्त्रालय र एक राज्यमन्त्रीसहित १० सदस्यीय मन्त्रिमण्डल बनेको थियो । नेकपा माओवादीका केसी मुख्यमन्त्री भएपछि भागबन्डा पुर्याउन नौबाट मन्त्रालयको संख्या बढाएर १३ र चार राज्यमन्त्री गरेर १७ सदस्यीय जम्बो मन्त्रिमण्डल बनेको थियो ।
मुख्यमन्त्री लीला गिरीले अवको पाँच वर्ष जनताको जिविकोपार्जन बढाउन प्रदेश सरकारले कार्यक्रम सञ्चालन गर्ने बताएका छन् ।
प्रतिक्रिया