काठमाडौं । उपप्रधान र भौतिक पूर्वाधार तथा यातायात मन्त्री नारायणकाजी श्रेष्ठ र चिनियाँ राजदूत चेन छोङसहितको टोलीले कलंकी चक्रपथ गौशाला सडकखण्डको स्थलगत निरीक्षण गरेको छ ।
चीनको सहयोगमा बन्ने भनिएको सडकखण्डको साइट क्लियरेन्स नभएका कारण चीनले काम सुरु नगरेको अवस्थामा मन्त्री श्रेष्ठको अगुवाईमा स्थलगत निरीक्षण भएको हो । निरीक्षणको क्रममा मन्त्रालयका सचिव केशवप्रसाद शर्मा, काठमाडौं महानगरपालिकाका मेयर बालेन शाह र नेपाल विद्युत प्राधिकरणका कार्यकारी प्रमुख कुलमान घिसिङ पनि उपस्थित थिए ।
अवलोकनपछि सञ्चारकर्मीहरुसँग कुरा गर्दै मन्त्री श्रेष्ठले दोस्रो खण्डको चक्रपथ विस्तार अब चाँडै शुरु हुने सहमति भएकाले बताए । उनले चिनियाँ राजदुतसँग मन्त्रालयमा छलफल गरी छटो भन्दा छिटो काम अघि बढाउने सहमति भएको बताए । उनले सो सडकखण्डमा भएका समस्याको समाधान भइसकेको बताउँदै बिजुलीका पोल र सडक छेउमा रहेका मन्दिरहरु अर्को ठाउँमा बनाउने तयारी गरिएको समेत जनाए ।
चक्रपथ विस्तारको जिम्मा लिएको चिनियाँ पक्षले साइट क्लियरेन्स नभएको भन्दै काम सुरु गरेको छैन । यसअघि कोटेश्वर कलंकी सडकखण्डमा काम गर्दा साइट क्लियरेन्स नहुँदा निर्धारित समयमा काम गर्न नसेपछि चिनियाँ पक्ष आलोचित भएको थियो ।
प्रतिक्रिया