प्रधानमन्त्रीले नाम मागेको केही घण्टाभित्रै मन्त्रीको नाम दिन्छौं : एकीकृत समाजवादी

काठमाडौं । नेकपा एकीकृत समाजवादीले प्रधानमन्त्रीले नाम माग्ने वित्तिकै मन्त्रीको नाम दिन तयार रहेको जनाएकोछ ।

एकीकृत समाजवादीको आज बसेको केन्द्रीय सचिवालय बैठकपछि प्रवक्ता जगन्नाथ खतिवडाले प्रधानमन्त्रीले नाम माग्ने वित्तिकै मन्त्रीको नाम दिन पार्टी तयारी अवस्थामा रहेको बताएका हुन् ।

बैठकमा सरकारमा सहभागिताबारे छलफल भएको थियो । सो बैठकमा आजै बिहान प्रधानमन्त्रीसँग भएको छलफलबारे अध्यक्ष माधवकुमार नेपालले ब्रिफिङ गरेका थिए ।

एकीकृत समाजवादीले उपप्रधामन्त्रीसहित कम्तिमा ३ मन्त्रालय पाउनुपर्ने माग राखेको छ । तर, प्रवक्ता खतिवडाका अनुसार सत्ता गठबन्धनमा अहिलेसम्म मन्त्रालयको भागबन्डा मिलिसकेको छैन।

बैठकले उपाध्यक्ष केदार न्यौपाने र स्थायी समिति सदस्य चुडामणि जंगलीले दिएको राजीनामा स्वीकृत गर्ने निर्णय गरेको छ।