काठमाडौं । काठमाडौंमा जारी प्रधानमन्त्री थ्री नेसन कप फुटबल प्रतियोगिताको उपाधिका लागि आज (शुक्रबार) नेपाल र लाओस भिड्दैछन् । काठमाडौंको दशरथ रंगशालामा हुने खेल नेपाली समयानुसार साँझ ५:३० बजेदेखि सुरु हुने छ ।
नेपाली टोलीका कप्तान किरण चेम्जोङले आफूहरु फाइनलका लागि तयार भएको बताएका छन् । नयाँ खेलाडीहरुको विश्वास बढाउनका लागि यो प्रतियोगितामा जित हात पार्न जरुरी रहेको कप्तान किरणको भनाइ छ ।
अहिलेको अवस्थामा टिम बनाउन नै चुनौतीपूर्ण रहेको बताउँदै किरणले नयाँ खेलाडीसँग छोटो समयमा खेलेको खेललाई आधार मान्दा सबैले राम्रो गर्ने बताए ।
नेपालले यसअघि लाओसमाथि २-० गोल अन्तरको जित हासिल गरेको थियो । नेपालले भुटानसँग भने १-१ गोलको बराबरी खेलेको थियो ।
नेपालसँग हार बेहोरेको लाओसले भुटानलाई भने २-१ ले पराजित गरेको थियो । नेपालसँग बराबरी खेलेसँगै भुटान प्रतियोगिताबाट बाहिरिएको थियो ।
प्रतिक्रिया