रविको राहदानी विवाद माथिको सुनुवाइ न्यायाधीश हरि फुँयालको इजलासमा

काठमाडौं । राष्ट्रिय स्वतन्त्र पार्टीका सभापति रवि लामिछानेमाथि राहदानी विवादमा मुद्दा नचलाउने महान्यायाधिवक्ताको निर्णयविरूद्ध परेको रिटमा आज सर्वोच्चमा सुनुवाइ हुन लागेको छ ।

आज न्यायाधीस हरि फुँयालको एकल इजलासमा सुनुवाइ हुन लागेको हो । मंगलबार न्यायाधीश अनिलकुमार सिन्हाको एकल इजलासमा पेशी परे पनि न्यायाधीस सिन्हाले हेर्न नमिल्ने भएपछि सुनुवाइ सरेको थियो । यसअघि संवैधानिक इजलासमा रविकै नागरिकताको विषयमा फैसलामा सहभागी भएका कारण सिन्हाले हेर्न नमिल्नेमा परेको थियो ।

युवराज पौडेल (सफल)ले दिएको रिटमा लामिछानेले झुटा विवरण दिएर राहदानी बनाएको अभियोगमा मुद्दा चलाउन नपर्ने भनी महान्यायाधिवक्ताले गरेको निर्णय दुराग्रहपूर्ण रहेको जिकिर गरिएको छ ।

महान्यायाधिवक्ता दिनमणि पोखरेलले यही चैत ६ गते राहदानी विवादमा लामिछानेमाथि मुद्दा चलाउन नपर्ने निर्णय गरेका थिए । रिट निवेदक पौडेलले सो निर्णय उत्प्रेषणको आदेशले बदरहुनुपर्ने माग गरेका छन् । उनले लामिछानेले झुटा विवरण दिएर राहदानी बनाएको दाबी गर्दै उनीउपर मुद्दा चलाउन परमादेश माग गरेका छन् ।

पौडेलले महान्यायाधिवक्ता कार्यालयका साथै जिल्ला प्रहरी परिसर काठमाडौं, अध्यागमन विभाग, प्रहरी प्रधान कार्यालय, रवि लामिछाने सहित ८ व्यक्ति र संस्थालाई विपक्षी बनाएका छन् ।