उत्तर प्रदेशका पूर्व सांसद अतिक अहमद र उनका दाजु अशरफको गोली प्रहार गरि हत्या

काठमाडौं । भारत उत्तर प्रदेशका पूर्व सांसद अतिक अहमद र उनका दाजु अशरफको गोली प्रहार गरि हत्या गरिएको छ ।

प्रहरी नियन्त्रणमा रहेका अतिक र अशरफ प्रयागराजस्थित एक अस्पतालमा स्वास्थ्य जाँच गरी फर्किने क्रममा उनीहरुमाथि गोली प्रहार भएको हो । उनीहरु दुबैजनामाथि पूर्व विधायक राजु पालको हत्याको आरोप छ ।

अस्पतालबाट फर्कने क्रममा पत्रकारलाई प्रतिक्रिया दिइरहेको बेला पत्रकारहरुको  भिडबाट गोली प्रहार भएको थियो । उनीहरुलाई गोली लागेको दृष्य पनि भारतिय केही टेलिभिजनमा प्रत्यक्ष देखिएको थियो ।

अतिकका वकिल विजय मिश्राले पत्रकारहरुको भिड भित्रबाट अज्ञात व्यक्तिले निकै नजिकबाट गोली हानेको बताएका छन् । पत्रकार बनेर आएकाहरुले गोली हानेको प्रारम्भिक अनुसन्धानबाट खुलेको भारतिय प्रहरीले दाबी गरेको छ । गोली हानेकाहरुले गोली चलाए लगत्तै घटनास्थलमै आत्मसमर्पण गरेका थिए । घटनामा संलग्न भएको आशंकामा प्रहरीले तीन जनालाई पक्राउ गरेको छ ।

अतिक अहमद र उनका भाइ अशरफलाई १० भन्दा बढी गोली लागेको स्थानीय मिडियाले उल्लेख गरेका छन् ।

उत्तर प्रदेशका मुख्यमन्त्री योगी आदित्यनाथले यस घटनालाई निकै गम्भीर भन्दै तीन सदस्यीय उच्चस्तरीय अनुसन्धान आयोग गठन गरेका छन् । मुख्यमन्त्री आदित्यनाथले अधिकारीहरुलाई सुरक्षामा चनाखो रहन र शान्ति सुव्यवस्था खलबलिने गतिविधि नियन्त्रण गर्न निर्देशनसमेत दिएका छन् ।