काठमाडौं। नेकपा एमालेका सांसद रघुजी पन्तले संसदमा प्रधानमन्त्री हराएको सूचना जारी गरेका छन् ।
प्रतिनिधिसभाको आजको बैठकमा सांसद पन्तले शुन्य समयमा बोल्दै प्रधानमन्त्री पुष्पकमल दाहाल प्रचण्ड हराएको सूचना गरेका हुन् । संसदमा बैठकमा प्रधानमन्त्री प्रचण्ड अनुपस्थित भएको भन्दै सांसद पन्तले व्यंग्यस्वरुप प्रधानमन्त्री हराएको सूचना वाचन गरेका हुन् ।
बैठकमा प्रधानमन्त्री प्रचण्ड हराएको सूचना वाचन गर्दै सांसद पन्तले भने, ‘नागरिकताको नाम पुष्पकमल दाहाल, चलनचल्तीको नाम प्रचण्ड, स्थायी ठेगाना फेरिराख्ने, अस्थायी ठेगाना कहिले खुमलटार कहिले बालुवाटार, हुलिया पहिले पहिले कोट पाइन्ट लगाउने गरे पनि हाल दौरा सुरुवाल र टोपी पनि लगाउने उमेर ६५ नाघेर ७० नपुगेको जस्तो देखिने । उहाँ केही दिनअघि प्रतिनिधिसभा बैठकमा झुलुक्क देखिएर हाल संसदमा आउनै छोडेकाले उहाँलाई फेला पार्नुहुने व्यक्तिले संसद भवन नयाँ बानेश्वरमा बुझाइदिनुहोला । उहाँ अन्तिम पटक देखिएको स्थान बालुवाटारको छेउछाऊ ।’
प्रतिक्रिया