ओमानविरुद्ध नेपालको खराब सुरुवात, खाता नखोल्दै दुबै ओपनर गुमायो

काठमाडौं । एसिसी प्रिमियर कपअन्तर्गत ओमानविरुद्ध नेपालले खराब सुरुवात गरेको छ । नेपालले खाता नखोल्दै दुबै ओपनर गुमाएको छ । टियु मैदानमा टस हारेर पहिला ब्याटिङको निम्तो पाएको नेपालले ४ ओभरमा कुनै पनि रन नजोड्दा दुबै ओपनर गुमाएको हो ।

नेपालले तेस्रो ओभरको दोस्रो बलमा ओपनर कुशल भुर्तेललाई टोलीले खाता नखोल्दै गुमाएको थियो । टियु एण्डबाट आएका तीव्र गतिका बलर बिलाल खानको बलमा कुशल एलबीडब्लू आउट भएका थिए । चोभार एण्डबाट आएका कलिमुल्लाहको चौथो ओभरको चौथो बलमा आसिफ शेख बोल्ड आउट भए ।

नेपालका भीम सार्की र रोहित पौडेल रनमा क्रिजमा छन् । आसिफले १० र कुशलले ८ बल खेल्दा रन जोड्न सकेनन् । नेपालले आजको खेलमा टोलीमा एक परिवर्तन गरेको छ । तीव्र गतिका बलर करण केसीलाई मौका दिँदा गुलशन झालाई बेन्चमा राखेको छ । टोलीमा अन्य परिवर्तन गरेको छैन ।