फ्लाई दुबईको जहाज दुर्घटना हुनबाट जोगियो, एक इन्जिनको सहायतामा जहाज गन्तब्यतर्फ

काठमाडौँ । फ्लाई दुबईको जहाज दुर्घटना हुनबाट जोगिएको छ । सोमबार राति एउटा इन्जिनमा समस्या आएर असामान्य झिल्का र विस्फोटको आवाज सुनिएपनि त्रिभूवन अन्तरराष्ट्रिय विमानस्थलमा आकस्मिक अवतरणको तयारी गरिएको थियो ।

एउटा इन्जिन फेल भएपनि अर्को इन्जिनको अवस्था ठिक भएको भन्दै केहीबेर आकाशमै होल्ड गरेर जहाज गन्तव्यतर्फ लागेको बताइएको छ। त्रिभुवन विमानस्थलबाट दुबईका लागि उडेको कलसाइन एफजेड ५७६ भएको जहाज उडेको केहीबेरमै समस्याग्रस्त बनेको थियो ।

असामान्य अवस्थाको जहाजले आकासमा केहीबेर फन्को लगाएको थियो । विमानस्थलमा आस्मिक अवतरणका सबै उपाय तयारी अवस्थामा राखिएपनि अवतरण गराउन नपरेको विमानस्थल स्रोतले जनाएको छ । पाइलटले अर्केो इन्जिन ठीक रहेकाले जहाजलाई उडान नियमित गर्न सकिने भनेर विमानस्थलको टावरसँग अनुमति मागेपछि अनुमति दिइएको बताइएको छ ।

प्राविधिक समस्या देखिएको सो जहाजमा १६९ जना यात्रु रहेका छन् । जसमा १२० विदेशी र ४९ जना नेपाली रहेका छन् ।