बुटवल । प्रदेश सरकारले बजेट निकासा रोकेको भन्दै अन्यौलमा परेको लुम्बिनी प्रदेश स्तरिय राष्ट्रपति रनिङ शिल्ड प्रतियोगिता आजबाट संचालन भएको छ । प्रतियोगिताको आज एक समारोहका बीच लुम्बिनी प्रदेशका प्रदेश प्रमुख अमिक शेरचनले उदघाटन गरे ।
निर्धारित समयभन्दा एक दिन पछि मात्र प्रदेश सरकारले रोक्का गरेको बजेट फुकुवा गरेपछि एकदिन ढिला प्रतियोगिता शुरु भएको हो ।
उदघाटन कार्यक्रमलाई सम्बोधन गर्दै प्रदेश प्रमुख शेरचनले युवाहरुलाई अनुशासित बनाउन र विकासमा जोड्न खेलकुद महत्वपूर्ण माध्यम हुन सक्ने बताए । उनले खेलकुदलाई मनोरञ्जन र स्वास्थ्यमा मात्र सिमित राख्न नहुने बताउँदै खेलकुदले समग्र देशको विकासमा भूमिका खेल्ने उल्लेख गरे । खेलजगत बहुआयामिक भएको उनको भनाई छ । युवाहरुको भविश्य उज्वल भएको चर्चा गर्दै राष्ट्रको जिम्मेवारी पनि युवाकै काँधमा रहेको उल्लेख गरे । उनले खेलाडीहरुलाई केन्द्रीय प्रतियोगिता जितेर आउन शुभकामना पनि दिए ।
कार्यक्रममा बोल्दै लुम्बिनी प्रदेशसभा सदस्य भोजप्रसाद श्रेष्ठले दुर्ब्यसनीमा लागेका युवालाई सहि मार्गमा ल्याउने मुख्य माध्यम खेलकुद हुन सक्ने बताए ।
प्रदेश खेलकुद परिषदका सदस्य सचिव जयप्रकाश भट्टराईको अध्यक्षतामा भएको उदघाटन समारोहमा सांसद सिके गुप्ता, कोशिश खड्का लगायतले प्रतियोगिताको सफलताको शुभकामना दिएका थिए । उदघाटन सत्रमा प्रदेशप्रमुख शेरचनले ब्यानर उडाउनुका साथै खेलकुद मशाल खेलाडीलाई हस्तान्तरण गरेका थिए । कार्यक्रममा निर्णायकहरुको तर्फबाट पद्मा चोधरी र खेलाडीहरुको तर्फबाट तुलसीराम थारुले सपथ ग्रहण गरेका थिए ।
आज भएको खेलमा तेक्वाण्दो तर्फ रुपन्देही २, दाङ २ तथा बाँके र नवलपरासीले १-१ स्वर्ण पाएका छन् । त्यसैगरि एथ्लेटिक्समा बाँके ४, दाङ ३ स्वर्ण, कपिलवस्तु ३ र बर्दियाले २ स्वर्ण जितेका छन् ।
प्रदेशभरिका १ हजार ८० खेलाडी र १५० अफिसियलहरु प्रतियोगितामा सहभागी रहेका छन् । प्रतियोगिता भोली सम्म चल्ने छ ।
प्रतिक्रिया