काठमाडौं । नेकपा एमालेले आफ्ना अध्यक्षमाथि झापामा सुनियोजित आक्रमण भएको आरोप लगाउँदै प्रधानमन्त्रीले संसदमा आएर जवाफ दिनुपर्ने माग गरेको छ ।
प्रतिनिधिसभाको आजको बैठकमा एमाले सांसद विष्णु पौडेलले पार्टी अध्यक्ष केपी शर्मा ओलीसहित आफ्ना नेताहरुमाथि भएको आक्रमणबारे प्रधानमन्त्रीले जवाफ दिनुपर्ने माग गरेका हुन् ।
बैठकको विशेष समयमा बोल्दै पौडेलले १३ वैशाखमा झापमा ओलीसहित सुवास नेम्वाङसहित एमालेका नेतामाथि आक्रमण भएको विषयमा गृहमन्त्रीको जवाफप्रति चित्त बुझाउन नसकिने प्रष्ट पारे । उनले आक्रमणमा सत्तारुढ दलका कार्यकर्ताहरुको सुनियोजित संलग्नता रहेको आफुहरुले थाहा पाएको बताउँदै त्यसबारे प्रधानमन्त्रीले नै संसदमा आएर जवाफ दिनुपर्ने माग गरे ।
अध्यक्ष ओली पाँचथरमा रहेका र त्यहाँको शान्ति सुरक्षा राम्रो नभएकाले कुनै अप्रिय घटना भए सरकारलाई महंगो पर्ने उनले चेतावनी दिए । उनले भने, ‘अध्यक्ष ओली र एमालेका नेतामाथि आक्रमण गरेर सरकारले के गर्न खोजेको हो ?’
नेतामात्र होइन आमनागरिकमाथि आक्रमण भएको र हत्या भएको भन्दै उनले सरकारले शान्ति सुरक्षा कायम गर्न नसकेको हो भन्दै प्रधानमन्त्रीसँग प्रश्न गरे ।
दिनदहाडै कपनमा पसलमै निरा पाण्डे आचार्यको हत्या भएको र हत्यारा पत्ता लगाउन नसकेको भन्दै उनले देशभर सरकारले शान्ति सुरक्षा कायम गर्न नसकेको बताए ।
प्रतिक्रिया