काठमाडौं । नक्कली भुटानी शरणार्थी प्रकरणमा मुछिएका नेपाली कांग्रेसका नेता एवं पूर्व गृहमन्त्री बालकृष्ण खाँण पक्राउ परेका छन् ।
नेपाली सर्वसाधारणलाई भुटानी शरणार्थी बनाएर अमेरिका लैजान पैसा संकलन गर्ने संगठित गिरोहको ठगी प्रकरणमा पूर्वगृहमन्त्री खाँण पनि आरोपित थिए ।
खाँणलाई बुधबार बिहान मैजुवहालस्थित उनकै निवासबाट काठमाडौं प्रहरी परिसरको टोलीले पक्राउ गरेको छ । उनलाई अहिले प्रहरी परिसर टेकु लगिएको छ । प्रहरीले आजै जडिबुटीबाट खाँणका स्वकीय सचिव नरेन्द्र केसीलाई पनि पक्राउ गरेको छ ।
यसअघि पक्राउ परेका विचौलियाहरुले खाँणलाई पोलेका थिए । उनीहरुले खाँण पत्नी मञ्जु खाँणलाई ६ करोड र आरजु राणालाई साढे दुई करोड रुपैयाँ बुझाएको अडियो यसअघि नै सार्वजनिक भैसकेको छ ।
यो सँगै उक्त घटनामा आरोपित ११ जनालाई प्रहरीले पक्राउ गरिसकेको छ । यसअघि मङ्गलबार काठमाडौँको टोखाका रामशरण केसी र मोरङका गोविन्द चौधरीलाई समेत प्रहरीले पक्राउ गरेको थियो ।
त्यसअघि प्रहरीले पूर्वगृहमन्त्री रामबहादुर थापाका सुरक्षा सल्लाहकार इन्द्रजित राईसहित बहालवाला सचिव (तत्कालीन गृहसचिव) टेकनारायण पाण्डे, सन्दीप रायमाझी, केशव दुलाल, सानु भन्डारी, टङ्क गुरुङ, सन्देश शर्मा पोखरेल र सागर थुलुङलाई पनि पक्राउ गरिसकेको छ ।
उक्त घटनामा आरोपित नेकपा (एमाले) का सचिव टोपबहादुर रायमाझी भने अझै फरार छन् । उनलाई प्रहरीले खोजी गरिरहेको छ । जिल्ला प्रहरी परिसरले उनीविरुद्ध सङ्गठित अपराधमा अनुसन्धान गरिरहेको छ । उक्त घटनामा हालसम्म एक सय छ जनाले २० जाहेरी दिएका छन् । उनीहरूले कुल २३ करोड २५ लाख रुपैयाँ ठगी भएको भनी प्रहरीमा जाहेरी दिएका छन् ।
प्रतिक्रिया