काठमाडौं । नेपाली कांग्रेसका सभापति शेरबहादुर देउवाले प्रधानमन्त्री पुष्पकमल दाहाल प्रचण्डलाई भेटेका छन् ।
पार्टीको पदाधिकारी बैठकअघि सभापति देउवाले प्रधानमन्त्री प्रचण्डलाई भेट गरेका हुन् । नक्कली भुटानी शरणार्थी प्रकरणमा आफ्ना विश्वासपात्र नेता एवं पूर्वगृहमन्त्री बालकृष्ण खाँण पक्राउपरेपछि तनाबमा रहेका देउवाले आज पदाधिकारी बैठक बोलाएका छन् । सो बैठकले खाँणलाई निलम्बन गर्ने या नगर्ने भन्नेबारे निर्णय गर्ने बताइएको छ । बुधबार बसेको बैठकमा खाँणलाई निलम्बन गर्नुपर्ने माग उठेको थियो ।
देउवाले पार्टीका उपसभापतिसमेत रहेका उपप्रधान तथा रक्षामन्त्री पूर्णबहादुर खड्कालाई लिएर प्रधानमन्त्री प्रचण्डलाई भेट्न देउवा बालुवाटार पुगेका हुन् ।
तर, सो भेटमा नक्कली भुटानी शरणार्थी प्रकरणबारे छलफल नभएको र सरकारले ल्याउने नीति तथा कार्यक्रम र बजेटबारे कुराकानी भएको प्रधानमन्त्री प्रचण्डको सचिवालयले जानकारी दिएको छ ।
नक्कली भुटानी शरणार्थी प्रकरणमा पूर्वगृहमन्त्री खाँण बुधबार पक्राउ परेका थिए । एमालेका नेता तथा पूर्वउपप्रधानमन्त्री टोपबहादुर रायमाझीविरुद्ध पनि पक्राउ पुर्जी जारी भइसकेको छ ।
प्रतिक्रिया