बर्दिया । उदघाटन नहुँदै भांच्चिएको बर्दियाको जब्दीघाटको पुलमुनी सत्तारुढ नेपाली कांग्रेसका सांसद एवम् पूर्वमन्त्री सञ्जय गौतमले आमरण अनशन थालेका छन् । विकास निर्माणका विभिन्न १५ बुँदे माग राख्दै बर्दिया क्षेत्र नम्बर १ बाट प्रतिनिधि सभा सदस्य निर्वाचित गौतमले आमरण अनशनमा थालेका हुन् ।
विभिन्न १५ बुँदे मागहरूको सूचि अनसनस्थलमा राख्दै उनले जब्दीघाटको भाँच्चिएको पुल मुनि टेन्ट लगाएर आमरण अनशन बसेका छन् । १५ बुँदे मागको पहिलो नम्बरमा जब्दीघाटको भत्किएको पुल निर्माणको काम सुरु गर्नुपर्ने माग रहेको छ ।
नेपालमै बदनाम कमाएको पप्पु कन्स्ट्रक्सनले बनाएको सदरमुकाम गुलरिया र बारबर्दिया नगरपालिका जोड्ने जब्दीघाटको पुल उदघाटन नहुँदै २०७४ साउन अन्तिम साता भत्किएको थियो ।
सांसद गौतमले जिल्ला सदरमुकाम डुबान र कटानको जोखिमबाट बचाउन तटबन्धनका काम गर्नुपर्ने, सिँचाइ आयोजनाहरुमा बजेट सुनिश्चित हुनुपर्ने लगायतका माग पनि राखेका छन् ।
अनशन बस्नु अघि साँसद गौतमले बर्दियाका प्रमुख जिल्ला अधिकारी मार्फत प्रधानमन्त्रीलाई ज्ञापन पत्र पठाएका थिए ।
प्रतिक्रिया