दाङ । आफ्नै घरमा बोलाएर युवतीलाई बलात्कार गरेको आरोपमा देउखुरी बहुमुखी क्याम्पसका पूर्व क्याम्पस प्रमुख शेषमणि गौतम पक्राउ परेका छन् । उनलाई बलात्कारको आरोपमा दाङको लमहीबाट प्रहरीले पक्राउ गरेको हो ।
गएराति प्रहरीले गौतमलाई लमही स्थित आफ्नै निवासबाट पक्राउ गरेको जिल्ला प्रहरी कार्यालय दाङले जनाएको छ । २६ वर्षीया युवतीलाई आफ्नै घरमा बोलाइ बलात्कार गरेको आरोपमा लमही नगरपालिका वडा नम्बर ५ रातो डाँडा निवासी गौतमलाई प्रहरीले पक्राउ गरिएको दाङ प्रहरी प्रवक्ता राजन गौतमले बताए ।
आइतवार दिउँसो करिब १२ बजे गौतमले ती युवतीलाई आफ्नो घरमै बोलाई बलात्कार गरेको उजुरीका आधारमा पक्राउ गरिएको प्रहरी प्रवक्ता गौतमले जानकारी दिए । युवती कुन प्रयोजनमा घरमै पुगेको र जबर्जस्ती भए नभएको विषयमा प्रहरीले अनुसन्धान सुरु गरेको छ । डीएसपी गौतमका अनुसार प्राध्यापक गौतमलाई आवश्यक अनुसन्धानका लागि मुद्दा दर्ता गरी म्याद थपको लागि अदालत ल्याउने तयारी भइरहेको छ ।
पक्राउ परेका गौतम नेपाली कांग्रेसका जिल्ला सदस्य, देउखुरी बहुमुखी क्याम्पसका हालका प्रध्यापक तथा संचालक समितिका कोषाध्यक्ष हुन् ।
प्रतिक्रिया