जलहरीको विषयमा सांसदको अभिव्यक्ति रेकर्डबाट हटाउने सहमति, अवरुद्ध संसद खुल्ने

काठमाडौं । प्रमुख प्रतिपक्षी नेकपा एमालेले अवरुद्ध गरेको संसद खुलाउन संसदका प्रमुख तीन दलबीच सहमति भएको छ ।

पशुपतिनाथमा चढाइएको जलहरी सुन प्रकरणमा सत्तारुढ दलका सांसद लेखनाथ दाहालले बोलेको कुरा संसदीय रेकर्डबाट हटाउने सहमति भएको छ । यसका साथै एमालेले अब संसद अवरुद्ध नगर्ने प्रतिवद्धता जनाएको छ ।

सांसद दाहालले नीति तथा कार्यक्रमको बचाउ गर्दै एमाले अध्यक्ष एवं पूर्वप्रधानमन्त्री केपीशर्मा ओलीको पालामा पशुपतिमा जलहरी बनाउन खरिद गरिएको सुनमा हेराफेरी भएको र पित्तल मिसाईएको लगाएतका विषय सहित अन्य भ्रष्टाचारको विषयमा नैतिक जिम्मेवारी लिनुपर्ने बताएका थिए । त्यसपछि एमालेले आफ्ना अध्यक्षमाथि सत्तापक्षले आरोप लगाएको भन्दै त्यसमा माफी नमागेसम्म संसद चल्न नदिने भन्दै हिजोको बैठक अवरुद्ध गरेको थियो । हिजो प्रधानमन्त्रीले नीति तथा कार्यक्रममा उठेका विषयमा सम्बोधन गर्ने कार्यसूची रहेको थियो ।

बैठकमा जलहरी लगाउने विषय पशुपति क्षेत्र विकास कोषसँग रहेकाले पूर्वप्रधानमन्त्रीसँग यसको सम्बन्ध नरहेको कुरा प्रधानमन्त्री प्रचण्डले प्रष्ट पारेका थिए । प्रधानमन्त्रीले आज संसदलाई सम्बोधन गर्दा यस विषयमा सरकारको धारणा राख्ने भएका छन् ।