बुटवल । केहीदिन देखि लगातार बुटवल र यस आसपासका क्षेत्रहरु पटक पटक विद्युत अवरुद्ध हुन थालेपछि रुपन्देही होटल तथा रेष्टुरेन्ट ब्यवसायी संघ आन्दोलित बनेको छ । संघले लगातारको विद्येत अनियमितताका विषयमा बुधबार नेपाल बिद्युत प्राधिकरण कार्यालय, बुटवल वितरण केन्द्र र नयाँमिल वितरण केन्द्रमा ध्यानाकर्षण पत्र बुझाएको छ ।
रुपन्देही होटल तथा रेष्टुरेन्ट ब्यवसायी संघका अध्यक्ष लेखनाथ भण्डारी सहित पदाधिकारीहरुले बुटवल वितरण केन्द्र पुगेर केन्द्रका प्रमुख कपिलराज पाण्डेलाई तथा नयाँँमिल वितरण केन्द्र पुगेर शाखा प्रमुख रितेश गुप्तालाई बुधबार ध्यानाकर्षण पत्र बुझाएको हो ।
बुटवलमा ध्यानाकर्षणपत्र बुझाउँदै रुपन्देही होटल तथा रेष्टुरेन्ट ब्यवसायी संघका अध्यक्ष लेखनाथ भण्डारीले लगातार अघोषित लोडसेडिङको कारण होटल तथा रेष्टेरेन्ट ब्यवसायीहरु ठुलो समस्यामा परेको बताए । विद्युत अनियमितताले पर्यटन ब्यवसायमा सबैभन्दा ठूलो असर परेको उनले बताए । कोभिड संक्रमण, आर्थिक संकटसंगै लगातार विद्युतको समस्याको कारण समस्या आईपरेको बताउँदै उनले बजारमा थ्रि फेस लाईन जडान गरेको ठाँउमा समेत एक फेसमात्र आएको अवस्था रहेको जनाए ।
ध्यानाकर्षण पत्र बुझ्दै नेपाल विद्युत प्राधिकरण बुटवल वितरण केन्द्रका प्रमुख कपिलराज पाण्डेले कालिगण्डकीको उत्पादन कम हुँदा समस्या देखिएको जानकारी दिए । गर्मीका कारण अत्याधिक उपकरण प्रयोग हुँदा भोल्टेजको समस्या रहेको उनले दाबी गरे ।
प्राधिकरण, नयाँमिल वितरण केन्द्रका प्रमुख रितेश गुप्ताले विद्युत वितरण प्रणालीमा केहि कठिनाई रहेको स्वीकार गर्दै एकै रात १२ पटकभन्दा बढि ट्रिपिङ हुने समस्या देखिएको बताए ।
प्रतिक्रिया