काठमाडौं । नक्कली भुटानी शरणार्थी प्रकरणमा फरार रहेका थप एक जनालाई प्रहरीले पक्राउ गरेको छ । काठमाडौंको असन घर भई नयाँ बजार बस्ने ५९ वर्षका केशव तुलाधरलाई काठमाडौं उपत्यका अपराध अनुसन्धान कार्यालयले पक्राउ गरेको हो ।
तुलाधरमाथि ठगी तथा संगठित अपराध समेतको कसुरमा जिल्ला अदालत काठमाडौंमा ठगी तथा संगठित अपराधको मुद्दा रहेको छ । पक्राउ परेका तुलाधरलाई अनुसन्धानका लागि जिल्ला प्रहरी परिसर काठमाडौं पठाइएको उपत्यका अपराध अनुसन्धान कार्यालयका प्रवक्ता रवीन्द्र रेग्मीले बताए ।
नेपाली नागरिकलाई भुटानी शरणार्थी बनाएर अमेरिका पठाउने ठगी प्रकरणमा प्रहरीले बुझाएको प्रतिवेदनका आधारमा जिल्ला सरकारी वकिल कार्यालय काठमाडौंले ३० जनाविरुद्ध जिल्ला अदालत काठमाडौंमा ठगी तथा संगठित अपराधको मुद्दा दर्ता गरेकोमा तुलाधरसहित केही व्यक्ति फरार रहेका थिए । ।
उक्त मुद्दामा कांग्रेस नेता बालकृष्ण खाँण, एमाले नेता टोपबहादुर रायमाझीलगायत १६ जना हाल पुर्पक्षका लागि थुनामा छन् भने दुई जना भने धरौटी बुझाएर रिहा भएका छन् ।
प्रहरीका अनुसार तुलाधरमाथि विभिन्न प्रलोभनमा पारी जाहेरवाला गजेन्द्र बुढाथोकीलगायतका व्यक्तिलाई ठगी गरेको आरोप छ ।
प्रतिक्रिया