काठमाडौं । नक्कली भुटानी शरणार्थी मुद्दामा जिल्ला अदालत काठमाडौंले सजाँय निर्धारण गरेको छ । न्यायाधीश तेजबहादुर खड्काको इजलासले दोषी ठहरिएका १६ जनाको फरक फरक कसुरमा सजाँय निर्धाण गरिएको हो ।
अदालतले नेकपा एमालेका नेता तथा पूर्वमन्त्री टोपबहादुर रायमाझीलाई ४ वर्ष कैद र ४० हजार जरिबाना तोकेको छ।
रायमाझीले ठगीमा दुई वर्ष कैद र २० हजार जरिबाना, संगठित अपराधमा ३ वर्ष कैद र ३० हजार जरिबाना, राज्य विरुद्धको कसुरमा १ वर्ष ६ महिना कैद र १५ हजार जरिबाना, सोही कसूरमा थप ६ महिना कैद भोग्नु पर्ने भएको छ। त्यस्तै एकीकृत कसुरमा ४ वर्ष कैद र ४० हजार जरिबाना तोकिएको हो।
त्यस्तै पूर्व सचिव टेकनारायण पाण्डेलाई ४ बर्ष जेल सजायँ तोकिएको छ। उनले ४ वर्ष कैद र ४० हजार रुपैयाँ जरिवानाको सजाय भोग्नु पर्ने भएको छ।
पूर्व सचिव टेकनारायण पाण्डेलाई ठगीमा २ वर्ष कैद र १५ हजार जरिवाना, संगठित अपराधमा ३ वर्ष कैद र ३० हजार जरिवाना, राज्यविरुद्धको कसुरमा १ वर्ष ६ महिना कैद र १५ हजार जरिवानाको सजाय तोकिएको हो । एकीकृततर्फ ४ वर्ष ४० हजार रुपैयाँ जरिवाना तोकिएको फैसालामा उल्लेख गरिएको छ ।
भुटानी शरणार्थीका नेता टेकनाथ रिजाललाई दुई वर्ष कैद तोकिएको छ। अदालतले रिजाललाई २ बर्ष कैदसहित २० हजार जरिवाना तोकेको हो ।
जसअनुसार सरकारी लिखत कीर्तेमा एक वर्ष कैद र १० हजार रुपैयाँ जरिवाना, ठगी मुद्दामा एक वर्ष कैद र १० हजार, संगठित अपराधमा एक वर्ष ६ महिना कैद र १५ हजार रुपैयाँ, राज्यविरुद्धको कसुरमा ६ महिना कैद र पाँच हजार जरिबाना तोकिएको हो ।
जसअनुसार एकीकृत तर्फ दुई वर्ष कैद र २० हजार जरिवाना गरिएको फैसालामा उल्लेख छ ।
उता नक्कली भुटानी शरणार्थी प्रकरणको मुद्दाका मुख्य योजनाकार मानिएका केशवप्रसाद दुलाल र सानु भण्डारी तथा सागर राई, सन्देश शर्मा, डा इन्द्रजित राई, गोविन्दकुमार चौधरी, आङदेवा शेर्मा र टङ्क नारायाण पाण्डेलाई चार वर्ष कैद तथा रु ४० हजार जरिवाना तोकिएको छ ।
जसअनुसार सरकारी लिखत किर्ते कसुरमा २ वर्ष कैद र २० हजार, ठगीमा २ वर्ष कैद र २० हजार, संगठित अपराधमा ३ बर्ष कैद र ३० हजार, राज्यविरुद्धको कसुरमा १ वर्ष कैद र १५ हजार जरिबाना तिर्नु पर्ने भएको हो ।
सबै कसुरको एकीकृततर्फमा कुल ४ वर्ष ४० हजार कैद जिल्ला अदालत, काठमाडौंले जनाएको छ।
यसैगरी शमशेर मिया, हरिभक्त महर्जन, नीरञ्जनकुमार खरेल र नरेन्द्र केसीलाई एक वर्ष कैद र रु १० हजार जरिवाना तोकिएको छ । सजाँय सुनाइएका सबै पुर्पक्षका लागि हाल थुनामा रहेका छन् ।
प्रतिक्रिया