काठमाडौं । नक्कली भुटानी शरणार्थी प्रकरणमा पूर्वगृहमन्त्री तथा नेपाली कांग्रेसका नेता बालकृष्ण खाणलाई दुई वर्ष कैद सजाय र २० हजार रुपैयाँ जरिवाना हुने भएको छ ।
जिल्ला अदालत काठमाडौंका न्यायाधीश तेजबहादुर खड्काको इजलासले मंगलबार सजाय निर्धारण गर्दै खाणलाई दुई वर्ष कैद र २० हजार रुपैयाँ जरिबाना तोकेको हो । यसअघि असार २४ गते सोही इजलासले खाणलाई दोषी ठहर गरेको थियो ।
अदालतले खाणलाई विभिन्न कसुरमा छुट्टाछुट्टै सजाय निर्धारण गरेको छ । ठगी कसुरमा एक वर्ष कैद र १० हजार रुपैयाँ जरिवाना, संगठित अपराधमा एक वर्ष छ महिना कैद र १५ हजार रुपैयाँ जरिबाना तथा राज्यविरुद्धको कसुरमा छ महिना कैद र पाँच हजार रुपैयाँ जरिबाना तोकिएको छ । साथै थप तीन महिना कैदसमेत निर्धारण गरिएको छ ।
यद्यपि, प्रचलित कानुनी व्यवस्थाअनुसार सजाय एकीकृत रूपमा गणना हुँदा खाणले दुई वर्ष कैद सजाय भोग्नुपर्ने र २० हजार रुपैयाँ जरिबाना तिर्नुपर्ने अदालतले जनाएको छ ।
नक्कली भुटानी शरणार्थी प्रकरणमा जिल्ला अदालत काठमाडौंले असार २४ गते १६ जनालाई दोषी ठहर गरेको थियो भने सात जनाले सफाइ पाएका थिए ।
प्रतिक्रिया