बुटवल । पाल्पाको रिब्दिकोट गाउँपालिका(२ जोर्तेमा पहिरोले जीप पुर्दा ३ जनाको मृत्यु भएको छ । ८ जना घाइते भएका छन् । गुल्मीको तम्घासबाट बुटवल आउदै गरेको लु १ ज ४६०० नम्बरको स्कार्पियो आज बिहान जोर्तेमा पहिरोमा परेको हो।
पहिरोमा परी ३ जनाको घटनास्थलमै मृत्यु भएको र तीन बच्चासहित ८ जनालाई उद्धार गरिएको पाल्पा प्रहरीले जनाएको छ ।
मृत्यु हुनेमा गुल्मी रेसुङ्गा ७ की ५० वर्षिया मनकला क्युदारा र पाल्पा घर भई जिल्ला प्रहरी कार्यालय गुल्मीको सञ्चार शाखामा कार्यरत प्रहरी सहायक हवल्दार यमबहादुर बोहोराको सनाखत भएको राजमार्ग ट्राफिक ब्यवस्थापन कार्यालय बुटवलले जनाएको छ । घाइते ८ जना र १ जना मृतकको सनाखत भइनसकेको ट्राफिक ब्यवस्थापन कार्यालयका ट्राफिक प्रहरी नायव उपरीक्षक होमबहादुर थापाले बताए ।
भाडाको स्कार्पियो बिहान साढे ८ बजे पहिरोले च्यापिएको जिल्ला प्रहरी कार्यालय पाल्पाका प्रहरी नायब उपरीक्षक वीरेन्द्र थापाले जानकारी दिए। पहिरो खस्दा पाल्पा–गुल्मी सडकखण्ड बन्द भएको छ।
प्रतिक्रिया