बाँकेको बाल सुधार गृहमा तोडफोड

काठमाडौं । बाँकेको जयेन्दु बाल सुधार गृहमा गयराती तोडफोड भएको छ । डुडुवा गाउँपालिका–६ आसमानपुरस्थित सुधार गृहमा सोही सुधार गृहमा राखिएका बालबन्दीहरुले तोडफोड गरेका हुन् ।

उनीहरुले सुधार गृहका झ्यालका सिसा फुटाउँदै सुरक्षामा खटिएका प्रहरीमाथि पनि ढुंगा र इँटा प्रहार गरेका थिए । सुधारगृहमा भएको तोडफोड र ढुंगा प्रहारले रातभरीको अवस्था तनावपूर्ण बनेको स्थानीय प्रत्यक्षदर्शीले बताए ।

स्थानीयवासीका अनुसार सुधार गृहभित्र रहेकाहरुले अहिले पनि नाराबाजी गरिरहेका छन् । अवस्था सामान्य बनाउने प्रयास भइरहेको बाँके प्रहरीले जनाएको छ ।

सुधार गृहमा बिभिन्न मुद्दामा दोषी ठहरिएकार पुर्पक्षका लागि सुधारगृह पठाइएका करिब ३ सय जना रहेका छन् । गत माघ अन्तिम साता सोही सुधार गृहमा आगजनीसमेत भएको थियो ।