बालसुधार गृहमा झडप र आगजनी, स्थिती तनावग्रस्त

नेपालगन्ज । बाँकेको डुडुवामा रहेको जयेन्दु बाल सुधार गृहमा मध्यरातीबाट सुरु भएको झडपलाई प्रहरीले नियन्त्रणमा लिएको छ । मध्यराती १२ बजेबाट सुरु भएको झडप आज अपरान्ह मात्र प्रहरीले नियन्त्रणमा लिएको हो ।

बालबन्दी बीचको झडपमा २० जना बढी घाइते भएका छने भने सुधारकेन्द्रभित्र आगजनी भएको छ । बालबन्दीहरुले आफु बस्ने लत्ता कपडा भाँडाकुडा र फर्निचर आगजनी गरेको बाँके प्रहरी प्रमुख एसपी तुलबहादुर कार्कीले बताए । घाइते २० जना बढीको नर्सिङहोम नेपालगन्जमा उपचार भइहेको छ ।

प्रहरीका अनुसार, बालसुधार गृहमा राती ११ बजेतिर बिबाद सुरु भएको र मध्यराती १२ बजेबाट दुइपक्षबीच झडप भएको हो । बालबन्दीहरुले सुधारगृहको तल्लो तला आगजनी गरेर ध्वस्त बनाएको बाँकेका प्रहरी प्रवक्ता दीपक पतालीले बताए । उनले बिहानैबाट भवन भित्रबाट प्रहरीमाथि आक्रमण भएको जनाउँदै उनीहरु थाकेपछि मात्र प्रहरी भवन भित्र पसेर नियन्त्रणमा लिएको बताए । ‘उनीहरुकै ढुँगामुढाबाट कतिपय बालबन्दी घाइते भएका छन् भने, कतिपय भागेका छन्,’ उनले भने, ‘भागेकाहरुको तथ्यांक निकाल्दै छौं ।’

बाल सुधार गृहमा २ सय ५० बढी बालबन्दी रहेका छन् । केही दिन अघिमात्रै तीन जना प्रहरीलाई कुटेका थिए । यसअघि झडप गरिरहनेहरुलाई प्रहरीले नौबस्ता सुधार गृहमा स्थानान्तरण गरेको थियो ।

पछिल्लो समय बाल सुधार गृह प्रशासनका लागि सुरक्षा चुनौती बनिरहेको छ । प्रहरीले बल प्रयोग गर्न नमिल्ने र भित्र रहेकाहरु आपसमा लडिरहने प्रचलन जस्तै बनेको एक प्रहरी अधिकारीले बतार्ए । १८ वर्ष नपुगेलाई राख्न बनाइएको बाल सुधार गृहमा १८ वर्ष माथिकाहरुलाई पनि मुद्दा किनारा नलाग्दा सम्म भन्दै बसाउँदा सधै लफडा हुने गरेको जानकारहरु बताउँछन् ।