काठमाडौं । यस वर्षको बडा दसैंको टीका शुभसाइतमा लगाइएको छ ।
नवदुर्गाको प्रसादका रूपमा मान्यजनको हातबाट रातो टीका एवं समृद्धिको प्रतीक जमरा लगाइएको हो । रातो टीकालाई शुभ साइतको प्रतीक मानिन्छ । बिहान ११ बजेर २ मिनेट जाँदा घरघरमा आफन्तजनको हातबाट टीका लगाइएको छ ।
घटस्थापनाका दिन स्थापना गरिएको घडाबाट अभिषेक गरी विजयादशमीको टीका लगाइन्छ । आश्विन शुक्ल दशमीका दिनमा मनाइने विजयादशमी पर्व आज हर्षोल्लासका साथ मान्यजनबाट दुर्गाभवानीको प्रसादस्वरुप टीका र जमरा थापेर मनाइएको हो । आजबाट सुरु भएको टीका लगाउने क्रम कोजाग्रत पूर्णिमाको दिनसम्म रहन्छ ।
नेपाल पञ्चाङ्ग निर्णायक समितिले आज देवी विसर्जनको साइत बिहान १० बजेर ३७ मिनेटमा रहेको जनाएको थियो । देवी विसर्जन पछि ११ बजेर २ मिनेटको साइतमा टीका ग्रहण उत्तम रहेको समितिले जनाएको थियो । सोही अनुसार शुभसाइतमा टीका ग्रहण गरिएको हो ।
टीका लगाउँदा मान्यजनले आशिर्वाद दिने चलन रहेको हुन्छ।
प्रतिक्रिया