बुटवल । रुपन्देहीका २२ वर्षीय युवकको पाल्पाको भुतखोलामा डुबेर मृत्यु भएको छ ।
रुपन्देहीको सिद्धार्थनगर नगरपालिका-९ का बिमल आचार्यको मंगलबार बिहान तिनाउ गाउँपालिका(३ भुतखोलामा डुबेर मृत्यु भएको जिल्ला प्रहरी कार्यालय पाल्पाका डिएसपी सुगन्ध श्रेष्ठले जानकारी दिए ।
आचार्य भैरहवाकै साथी युना दाहालसँग पाल्पामा घुम्न गएका थिए । भुतखोलामा उनीहरू दुबै जना पुगेको प्रहरीले जनाएको छ ।
डिएसपी श्रेष्ठका अनुसार आचार्य र दाहाल दुबै जनाको उद्धार गरी अस्पताल पुर्याइएको थियो । अस्पताल पुर्याउँदा चिकित्सकले आचार्यलाई मृत घोषणा गरेको थियो । दाहालको बुटवल अस्पतालमा उपचार भइरहेको र स्वास्थ्य अवस्था मध्यम रहेको प्रहरीले जनाएको छ ।
घटनाको बारेमा थप अनुसन्धान भइरहेको जिल्ला प्रहरी कार्यालय पाल्पाले जनाएको छ । बुटवलदेखि ६ किलोमिटर दुरीमा रहेको भुतखोलामा घुम्न जाने कैयौं युवाहरूको हरेक वर्ष डुबेर मृत्यु हुने गरेको छ ।
प्रतिक्रिया