नेपालगन्ज । जाजरकोट केन्द्रबिन्दु भएर गएको भूकम्पबाट घाइते भएकाहरु र उनका कुरुवाहरुलाई नेपालगन्जमा लगातार निशुल्क खानाको ब्यवस्थापन गरिएको छ । भेरी अस्पतालमा उपचाररत भूकम्पमा परि घाइते भएका बिरामीहरु र उनिहरुका कुरुवाहरु सहित उपचारमा सेवारत स्वास्थ्यकर्मीहरुलाई अन्जनी माता रसोइ मार्फत नि-शुल्क खानाको ब्यवस्था गरिएको हो ।
भूकम्प पछि अस्पतालमा घाइते भर्ना भएयता ६३८ जनाले नि-शुल्क खानाको सेवा उपभोग गरेको रसोइघरका संचालक जितेन्द्र कुमार सिंहले जानकारी दिए । अहिले सम्ममा रसोइलाई १ हजार ३० छाक खानाको सहयोग प्राप्त भइसकेको उनले जनाए । बाँके युनेस्को क्लवको तर्फबाट ५२८ छाक खाना र स्थानीय ध्रुव देवकोटाबाट ५०२ छाक खानाको लागि रसोइघरलाई सहयोग प्रदान भएको आपतकालीन कार्यसन्चालन केन्द्र, बाँकेका फोकल पर्सन नरेस श्रेष्ठले जानकारी दिए ।
रसोइघरले प्रति छाक ४०का दरले लगातार भेरी अस्पतालमा उपचाररत बिरामी र उनका आफन्तलाई खानाको ब्यवस्थापन गर्दै आएको छ । खाना ब्यवस्थापनमा नेपालगन्जमा स्थानीय युवाहरुले स्वयमसेवकको भूमिका निभाइरहेका छन् ।
खानाका दाताहरुले अस्पताल बिकास समिति अध्यक्ष बिरेन्द्र शाह मार्फत अन्जनी माता रसोइका ब्यबस्थापक सिंहलाई सहयोग राशी हस्तान्तरण गरेका थिए । हस्तान्तरण कार्यक्रमको हरित अभियन्ता हेमन्त राज काफ्लेले सहजिकरण गरेका थिए ।
दाताहरुलाई आपतकालीन कार्यसन्चालन केन्द्र बाँकेले धन्यवाद ज्ञापन गरेको छ ।
प्रतिक्रिया