काठमाडौँ । नक्कली भुटानी शरणार्थी प्रकरणमा संलग्न ६ जना थुना मुक्त भएका छन् । उच्च अदालत पाटनले तोकेको धरौटी रकम बुझाएर ५ जना थुनामुक्त भएका छन् भने साधारण ताखेरमा छाड्न आदेश भएका एकजना पनि थुना मुक्त भएका छन् ।
साधारण तारेखमा मुक्त गर्न आदेश भएको आशिष बुढाथोकी सहित धरौटी रकम बुझाएर आएका ५ जनालाई थुनामुक्त गरिएको केन्द्रीय कारागारका जेलर ललित बस्नेतले जानकारी दिए । धरौटी तिरेर रिहा हुनेमा सन्दीप रायमाझी, शमशेर मियाँ, नरेन्द्र केसी, हरिभक्त महर्जन र रामशरण केसी रहेका छन् ।
धरौटी बुझाएर सन्दीप रिहा भएपनि उनका पिता पूर्व उप–प्रधानमन्त्री टोपबहादुर रायमाझी भने सोही प्रकरणमा थुनामै छन् ।
उच्च अदालतका न्यायाधीशद्वय जनक पाण्डे र प्रकाश खरेलको संयुक्त इजलासले मङ्सिर १५ मा सन्दीप सहितका ६ जनालाई धरौटीमा छाड्न आदेश गरेको थियो । धरौटीमा छाड्न आदेश भएका भुटानी शरणार्थी नेता टेकनाथ रिजालभने धरौटी रकम नबुझाएका कारण थुनामै रहेका छन् । उनीसँग अदालतले १५ लाख धरौटी माग गरेको थियो ।
धरौटी रकम बुझाएका ५ जनालाई प्रहरीले सम्पत्ति शुद्धीकरण अनुसन्धान विभाग र अख्तियार दुरुपयोग अनुसन्धान आयोगमा उपस्थित गराएको भएपनि सम्पत्ति शुद्धीकरण अनुसन्धान विभागले पनि अभियुक्तहरूसँग धरौटी लिएर छाड्ने निर्णय गरेपछि उनीहरु थुना मुक्त भएका हुन् ।
नक्कली भुटानी शरणार्थी प्रकरणमा मुख्य नाइके भनिएका ३ जनालाई नख्खु कारागारमा सरुवा गरिएको छ । सानु भण्डारी, केशव दुलाल र सन्देश शर्मालाई कारागार कार्यालय नख्खुमा सरुवा गरिएको केन्द्रीय कारागारले जनाएको छ ।
प्रतिक्रिया