भैरहवा । त्रिभुवन आर्मी क्लबले प्रधानमन्त्री कप एकदिवसीय पुरुष क्रिकेट प्रतियोगितामा चौथो जित निकालेको छ । आर्मीले लुम्बिनी प्रदेशलाई पराजित गर्दै चौथो जित निकालेको हो ।
बुधबार रुपन्देहीको भैरहवास्थित सिद्धार्थ क्रिकेट मैदानमा खराब मौसमका कारण २६ ओभरमा झारिएको खेलमा त्रिभुवन आर्मीले लुम्बिनीमाथि ६५ रनको जित निकालेको हो । यस जितसँगै आर्मी प्रधानमन्त्री कपमा ६ खेलमा ८ अंकका साथ तेस्रो स्थानमा उक्लिएको छ । लुम्बिनी भने १ जितका साथ नवौं स्थानमा छ ।
टस हारेर ब्याटिङको निम्तो पाएको आर्मीले निर्धारित २६ ओभरमा ७ विकेटको नोक्सानीमा १ सय ७० रनको योगफल बनायो । आर्मीका लागि ओपनर इमरान शेखले ७० बलमा ७ चौका र १ छक्कसहित नटआउट ६७ रन जोड्दै टिमलाई बलियो स्कोरसम्म पुर्याउन योगदान दिए ।
यस्तै, इमरानलाई कप्तान विनोद भण्डारीले २५ बलमा ३४ रन जोड्दै साथ दिए । उनले ४ चौका र १ छक्का प्रहार गरेका थिए । भिम सार्कीले ४० बलमा १ चौका र १ छक्कासहित २४ रन जोड्न सफल भए । बलिङमा लुम्बिनीका नर सार्की र मोहम्मद हुसेनले समान २–२ विकेट लिए ।
जवाफमा मैदानमा उत्रिएको लुम्बिनी प्रदेश २६ ओभरमा ८ विकेट गुमाएर १ सय ५ रनमै समेटियो । उसका लागि कृष्ण कार्कीले नटआउट ३५ रन जोड्दै लुम्बिनीको इनिङ सम्हाले । यस्तै, मिर्नाल गुरुङले १८, मोहम्मद हुसेनले १५ र अभिशेक गौतमले नटआउट ११ रन बनाए पनि अन्य ब्याट्सम्यानले दोहोरो अंकमा रन बटुल्न सकेनन् ।
आर्मीका कुशल मल्लले ६ ओभरमा ११ रन खर्चेर ४ विकेट लिए । सोमपाल कामीले २ तथा अभिनाश कर्ण र साहव आलमले समान १–१ विकेट लिए । आर्मीका इमरान शेख प्लेयर अफ द म्याच भए ।
प्रतिक्रिया