काठमाडौं । आईसीसी यू-१९ विश्वकप क्रिकेट अन्तर्गत सुपर सिक्सको खेलमा नेपालले शुक्रबार भारतको सामना गर्दैछ । सुपर सिक्सको पहिलो खेल गुमाइसकेको नेपाल भारतसँगको खेलपछि जित वा हार जे भए पनि घर फर्किनेछ ।
विश्वकपमा नेपालले भारतसँग तेस्रो पटक खेल्न लागेको हो । यसअघि खेलेका दुवै खेलमा नेपाल पराजित भएको थियो । सन् २००० मा कोलम्बोमा नेपाल र भारत यू-१९ विश्वकपमा भिडेका थिए ।
पहिलो खेलमा बंगलादेशसँग पराजित भएको नेपाल प्रतियोगिताबाट बाहिरिइसकेको छ । नेपाल बंगलादेशसँग ५ विकेटको पराजित भएसँगै नेपालको अर्को चरणमा जाने सम्भावना सकिइसकेको थियो ।
भारतले भने सुपर सिक्सको पहिलो खेलमा न्यूजिल्याण्डलाई पराजित गरेको थियो । भारत प्रतियोगिताको सेमिफाइनल नजिक रहेको छ । भारतसँगै सेमिफाइनलको दौडमा समूह १ बाट पाकिस्तान र बंगलादेश रहेका छन् ।
सुपर सिक्सको समूह १ बाट नेपाल सहित न्यूजिल्याण्ड र आयरल्याण्ड सेमिफाइनलको दौडबाट बाहिरिएका हुन् ।
नेपालले समूह चरणमा अफगानिस्तानलाई पराजित गरेर २ अंक हासिल गर्दै सुपर सिक्समा पुगे पनि अफगानिस्तान सुपरसिक्समा नरहेकाले सो २ अंक नेपालको सुपर सिक्समा नजोडिदा नेपाल अंकविहीन भएको हो । आजको खेलपछि नेपालको विश्वकप यात्रा सकिने छ र स्वदेश फर्किने छ ।
प्रतिक्रिया